ಸ್ತ್ರೀ ಸಂಘಟನಾಚಿ ಜಮಾತ್ ಆನಿ ಪಾವ್ಸಾ ಗಮ್ಮತ್ Back

ಸ್ತ್ರೀ ಸಂಘಟನಾಚಿ ಜಮಾತ್ ಆನಿ ಪಾವ್ಸಾ ಗಮ್ಮತ್

ಆಗೋಸ್ತ್ 03, 2024 ವೆರ್ ಸನ್ವಾರಾ ಸಾಂಜೆಚಾ ಮಿಸಾ ಉಪ್ರಾಂತ್ ಸ್ತ್ರೀ ಸಂಘಟನಾಚಿ ಜಮಾತ್ ಇಗರ್ಜೆಚಾ ಮೀಟಿಂಗ್ ಹೊಲಾಂತ್ ಚಲ್ಲಿ. ಸುರ್ವಿಲೆಂ ಗೀತ್ ಆನಿ ಪವಿತ್ರ್ ಪುಸ್ತಕಾಚಾ ವಾಚ್ಪಾ ವರ್ವಿಂ ಜಮಾತ್ ಸುರ್ವಾತ್ಲಿ. ಸಂಘಟನಾಚಿ ಅಧ್ಯಕ್ಷ್ ಶ್ರೀಮತಿ ಮರ್ಸಿ ಮಿನೇಜಸಾನ್ ಜಮ್ಲೆಲ್ಯಾ ಸಮೆಸ್ತಾಂಕ್ ಸ್ವಾಗತ್ ಕೆಲೆಂ. ಕಾರ್ಯದರ್ಶಿ ಶ್ರೀಮತಿ ಗ್ರೇಸಿ ಡಿಸೋಜಾನ್ ಆದ್ಲ್ಯಾ ಜಮಾತೆಚಿ ವರ್ದಿ ವಾಚ್ಲಿ. ಅಧ್ಯಕ್ಷಾನ್ ಫುಡ್ಲ್ಯಾ ದಿಸಾಂನಿ ರಾಷ್ಟ್ರೀಯ್ ಹಂತಾ ಥಾವ್ನ್ ಆಯೋಜನ್ ಕರ್ಚ್ಯಾ ರೆತಿರೆಂತ್ ಭಾಗ್ ಘೆಂವ್ಕ್ ಸಕ್ಕಡ್ ಸಾಂದ್ಯಾಂಕ್ ಉಲೊ ದಿಲೊ. ಸ್ತ್ರೀ ಆಯೋಗಾಂತ್ ಚಡಿತ್ ಸಾಂದೆ ಭರ್ತಿ ಜಾಂವ್ಚಾ ಪರಿ ಪ್ರಯತ್ನಾಂ ಕರ್ಚಾ ವಿಶಿಂ ವಿಚಾರ್ ವಿನಿಮಯ್ ಚಲ್ಲೊ.

ಜಮಾತೆ ಉಪ್ರಾಂತ್ ಪಾವ್ಸಾ ಗಮ್ಮತ್ ಕಾರ್ಯೆಂ ಮಾಂಡುನ್ ಹಾಡ್-ಲ್ಲೆಂ. ಕಾರ್ಯಾಕ್ ವಿಗಾರ್ ಬಾಪ್ ದೊ.ಜೋಸೆಫ್ ಮಾರ್ಟಿಸ್, ಸಹಾಯಕ್ ವಿಗಾರ್ ಬಾಪ್ ಕೇವಿನ್ ಡಿಸೋಜ, ಬ್ರದರ್ ಚಿನ್ನಪ್ಪ, ಗೊವ್ಳಿಕ್ ಪರಿಷತೆಚಿ ಉಪಾಧ್ಯಕ್ಷ್ ಶ್ರೀಮತಿ ಶೀಲಾ ಡಿಸೋಜ, ಎಕ್ವೀಸ್ ಆಯೋಗಾಚೊ ಸಂಚಾಲಕ್ ಮಾನೆಸ್ತ್ ಅನಿಲ್ ಪತ್ರಾವೊ ಆನಿ ಧರ್ಮ್ ಭಯ್ಣಿಂ ಹಾಜರ್ ಆಸ್-ಲ್ಲಿಂ. ಮಾನಾಚಾ ಸಯ್ರ್ಯಾಂಕ್ ಅಧ್ಯಕ್ಷಾನ್ ಫುಲಾಂ ದೀವ್ನ್ ಸ್ವಾಗತ್ ಕೆಲೆಂ. ಪ್ರಾರ್ಥನಾ ಸವೆಂ ಸೊಭಿತ್ ಸಾಂಸ್ಕೃತಿಕ್ ಕಾರ್ಯೆಂ ಸುರ್ವಾತ್ಲೆಂ.

ವಿಗಾರ್ ಮಾನಾದಿಕ್ ಬಾಪ್ ಜೋಸೆಫ್ ಮಾರ್ಟಿಸ್ ಹಾಣಿಂ ಪಾವ್ಸಾ ಗಮ್ಮತ್ ಕಾರ್ಯಾಚೆ ಶುಭಾಶಯ್ ಪಾಟವ್ನ್ ಆಪ್ಲೊ ಸಂದೇಶ್ ದಿಲೊ. ಶ್ರೀಮತಿ ಸಬಿತಾ ಫೆರ್ನಾಂಡಿಸ್ ಹಿಣೆಂ ಪಾವ್ಸಾ ಗಮ್ಮತಾ ವಿಶಿಂ ಉಲವ್ನ್, ಪಾವ್ಶಿಲ್ಯಾ ದಿಸಾಂನಿ ತಯಾರ್ ಕರ್ಚ್ಯಾ ವಿವಿಧ್ ಖಾಣ್-ಪಕ್ವಾನಾಂ ಆನಿ ತಾಂಚೆ ಥಾವ್ನ್ ಜಾಂವ್ಚ್ಯಾ ಫಾಯ್ದ್ಯಾ ವಿಶಿಂ ಮಾಹೆತ್ ದಿಲಿ. ಶ್ರೀಮತಿ ಸಬಿತಾ ಫೆರ್ನಾಂಡಿಸ್ ಆನಿ ಪಂಗ್ಡಾನ್ ಅಪುರ್ಬಾಯೆಚೊ ನಾಚ್ ಸಾದರ್ ಕೆಲೊ ಆನಿ ಜಮ್ಲೆಲ್ಯಾ ಸಮೆಸ್ತಾಂಕ್ ಮನೋರಂಜನ್ ಕೆಲೆಂ. ಶ್ರೀಮತಿ ಜುಲಿಯಾನಾ ಕುವೆಲ್ಲೊ ಆನಿ ಪಂಗ್ಡಾನ್ ಏಕ್ ಕೊಂಕ್ಣಿ ಗೀತ್ ಸಾದರ್ ಕೆಲೆಂ ಆನಿ ಜಮ್ಲೆಲ್ಯಾ ಸಮೆಸ್ತಾಂಚಿ ಮನಾಂ ಧಾದೊಶಿ ಕೆಲಿಂ. ಖಜನ್ದಾರ್ ಶ್ರೀಮತಿ ಪ್ರಮಿಳಾ ಫುರ್ಟಾಡೊನ್ ವಿವಿಧ್ ಖೆಳ್ ಚಲವ್ನ್ ವೆಲೆ. ವಿವಿಧ್ ಖೆಳಾಂತ್ ವಿಜೇತ್ ಜಾಲ್ಲ್ಯಾಂಕ್ ವಿಗಾರ್ ಬಾಪಾನಿಂ ಇನಾಮಾಂ ವಾಂಟ್ಲಿಂ. ಶ್ರೀಮತಿ ಗ್ರೇಸಿ ಡಿಸೋಜಾನ್ ಧನ್ಯವಾದ್ ಅರ್ಪಣ್ ಕೆಲೆಂ.

ಸಹಾಯಕ್ ವಿಗಾರ್ ಬಾಪ್ ಕೇವಿನ್ ಡಿಸೋಜಾ ಹಾಣಿಂ ಜೆವ್ಣಾಚೆರ್ ಆಶೀರ್ವಾದ್ ಮಾಗೊನ್ ಪ್ರಾರ್ಥನ್ ಭೆಟಯ್ಲೆಂ. ರುಚಿಕ್ ಜೆವ್ಣಾ ಸವೆಂ ಕಾರ್ಯೆಂ ಸಂಪ್ಲೆಂ. ಹ್ಯಾ ಸಗ್ಳ್ಯಾ ಕಾರ್ಯಾಚೆಂ ಸುಂಕಾಣ್ ಹಾತಿಂ ಘೆವ್ನ್ ಶ್ರೀಮತಿ ಡೊರಾ ಡಿಕುನ್ಹಾ ಹಿಣೆಂ ಅಪುರ್ಬಾಯೆನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ.

Report by: Felcy Lobo
Pictures: Pressy Pereira