ಕೊಂಚಾಡಿ ಪಯ್ಲ್ಯಾ ವಾಡ್ಯಾಂತ್ ಕ್ರಿಸ್ಮಸ್ ಆಚರಣ್ Back

ಕೊಂಚಾಡಿ ಪಯ್ಲ್ಯಾ ವಾಡ್ಯಾಂತ್ ಕ್ರಿಸ್ಮಸ್ ಆಚರಣ್

ಕೊಂಚಾಡಿ ಪಯ್ಲ್ಯಾ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ದಸೆಂಬ್ರಾಚಾ 13 ತಾರ್ಕೆರ್ ಸಾಂಜೆಚಾ 6 ವರಾರ್ ಕ್ರಿಸ್ಮಸ್ ಆಚರಣ್ ಕೆಲೆಂ. ಪಯ್ಲೆಂ ಸಾತ್ ಮೆಟಾಂಚೆ ವಿಧಾನ್ ಶ್ರೀಮತಿ ಝೀಟಾ ಸಿಕ್ವೇರಾನ್ ಚಲವ್ನ್ ವೆಲೆಂ. ಶ್ರೀಮತಿ ಗ್ರೇಸ್ ಡಿಸೋಜಾನ್ ವರ್ದಿ ವಾಚ್ಲಿ ಆನಿ ಜಲ್ಮಾ ದಿಸಾಚೆ ಉಲ್ಲಾಸ್ ಪಾಟಯ್ಲೆ. ವಿಗಾರ್ ಬಾಪ್, ಸಹಾಯಕ್ ವಿಗಾರ್, ಸಾಂತ್ ಅನ್ನಾ ಕೊವೆಂತಾಚಿ ಧರ್ಮ್ ಭಯ್ಣಿಂ ಕಾರ್ಯಾಕ್ ಹಾಜರ್ ಆಸಲ್ಲಿಂ. ಫಿರ್ಗಜ್ ಉಪಾಧ್ಯಕ್ಷ್ ಶ್ರೀಮತಿ ಶೀಲಾ ಡಿಸೋಜಾ ಸವೆಂ ಕ್ರಿಸ್ಮಸ್ ಆಚರಣ್ ಕೆಲೆಂ. ನತಾಲಾಂಚಿ ಗಿತಾಂ ಗಾಯ್ಲಿಂ. ಸಾಂತಾ ಕ್ಲಾಸಾಚಾ ಸಾಂಗಾತ್ಪಣಾಂತ್ ಭುರ್ಗ್ಯಾಂನಿ ನಾಚೊನ್ ಉಡೊನ್ ಗಿತಾಂ ಗಾಯ್ಲಿಂ. ಕೇಕ್ ಆನಿ ಪೀವನ್ ವಾಂಟ್ತಾನಾ, ಗುರ್ಕಾರ್ನ್ ಶ್ರೀಮತಿ ಬೆನ್ನಿ ಡಿಕುನ್ಹಾನ್ ವಾಡ್ಯಾಂತ್ ಸೆವಾ ದಿಲ್ಲ್ಯಾ ಪ್ರತಿನಿಧಿ, ಗುರ್ಕಾರ್ನ್ ಜುಲಿಯಾನ ಕಾರ್ಲೊ, ಶ್ರೀಮಾನ್ ಸ್ಟೇನಿ ಕ್ರಾಸ್ತಾ, ಶ್ರೀಮಾನ್ ಅನಿಲ್ ಪತ್ರಾವೊ ತಶೆಂಚ್ ರಾಜ್ಯ ಪ್ರಶಸ್ತಿ ಜೊಡ್ಲೆಲಿ ಶ್ರೀಮತಿ ಫೆಲ್ಸಿ ಫೆರ್ನಾಂಡಿಸ್ - ಹಾಂಕಾ ಸನ್ಮಾನ್ ಕೆಲೊ. ವಿಗಾರ್ ಬಾಪಾಂನಿ ಕ್ರಿಸ್ಮಸ್ ಸಂದೇಶ್ ದಿಲೊ. ಜೊವಿಟಾ ಆನಿ ವೀಣಾನ್ ಭುರ್ಗ್ಯಾಂಕ್ ತಶೆಂ ವ್ಹಡಾಂಕ್ ಖೆಳ್ ಖೆಳಯ್ಲೆ. ಹೌಸಿ-ಹೌಸಿ ಖೆಳವ್ನ್ ಜಿಕ್ಲೆಲ್ಯಾಂಕ್ ಇನಾಮಾಂ ವಾಂಟ್ಲಿಂ. ಸಹಾಯಕ್ ವಿಗಾರ್ ಬಾಪಾಂನಿ ಜೆವ್ಣಾಚೆರ್ ಆಶಿರ್ವಾದ್ ಘಾಲೊ. ವಾಡ್ಯಾಗಾರಾಂನಿ ರಾಂದುನ್ ಹಾಡಲ್ಲೆಂ ಜೆವಾಣ್ ಸರ್ವಾಂ ರುಚಿನ್ ಜೆವ್ಲ್ಯಾಂವ್. ಲ್ಹಾನಾಂ, ವ್ಹಡಾಂ, ಯುವಜಣಾಂ - ಸರ್ವಾಂ ಎಕಾ ಮನಾನ್ ಸಂತೊಸಾನ್ ಭಾಗಿದಾರಾಂ ಜಾವ್ನ್, ಹಾಸೊನ್ ಖೆಳೊನ್ ವಾಡ್ಯಾಂತ್ಲೊ ಎಕ್ವಟ್ ಪಾಚಾರ್ಲೊ. ಹೆಂ ಕ್ರಿಸ್ಮಸ್ ಆಚರಣ್ ವಾಡ್ಯಾಗಾರಾಂಕ್ ಸದಾಂಚ್ ಮನಾಂತ್ ಉರ್ಚೆ ತಸ್ಲೆಂ ಜಾಂವ್ಕ್ ಪಾವ್ಲೆ. ಗರ್ದನಾಚಾ ಗೊಟ್ಯಾಂತ್ ಜಲ್ಮಾಲ್ಲೊ ಜೆಜು ಆಮಾ ಸರ್ವಾಂಚಾ ಕುಟ್ಮಾಂತ್ ಆನಿ ಕಾಳ್ಜಾಂತ್ ಮ್ಹಣ್‌ ಆಶೆತಾಂವ್.