ಬುಳ್ಬುಳೆ by ಜೋಸೆಫ್ ಕರ್ನೆಲಿಯೊ Back

 ಬುಳ್ಬುಳೆ

ನಾಂವ್ ತಾಚೆಂ ಸಿಜ್ಯೆಸ್ ತಾಕೊಡೆ
ಉತರ್ಲಾ ತೊ ಜಿಣ್ಯೆಂತ್ - ಜಾಯ್ತೆ ಅಕೊಡೆ
ಹಾಸ್ಯ್ ಲೇಖನ್ ತಾಚೆಂ - ಗೋಡ್ ಸಾಕ್ರಿ ಖೊಡೆ
ಹಾಸೊನ್ ಹಾಸೊನ್ ಕುಸಾಳಾಂ ದುಕಂವ್ಚೆ 'ಪಕೋಡೆ'

ಲಿಕ್ಲ್ಯಾತ್ ತಾಣೆಂ ಜಾಯ್ತೆ ಹಾಸ್ಯಾಚೆ ಬೂಕ್ 
ಗಾಂವಾಂತ್ ಪರ್ಗಾಂವಾಂತ್ ವಾವುರ್ನ್ ಥಾಂಬಯ್ಲಿ ಭುಕ್ 
ಜಿಣ್ಯೆಂತ್ ಭೊಗುನ್ ದೂಕ್ ಆನಿ ಸುಖ್
ಮಹಾನ್ ಸಾಹಿತಿ ತೊ - ಕೆದ್ನಾಂಯ್ ಹಾಸ್ತೆಂ ಮುಖ್ 

ಅಭಿಮಾನಿ ಹಾಂವ್ ತಾಚೊ - ಸಾದೊ ವ್ಯಾಪಾರಿ
ಮೊಗಾನ್ ದಿಲ್ಯಾತ್ ಬೂಕ್  - ಮನಾನ್ ಉಪ್ಕಾರಿ
ಎಕಾ ಉತ್ರಾನ್ ಜಾಲೊಂ ಹಾಂವ್ ತಾಚೊ ರಿಣ್ಕಾರಿ
ಸದಾಂಚ್ ಆಸ್ತಲೊಂ ತಾಕಾ ಹಾಂವ್ ಆಬಾರಿ

ನಾಂವಾಡ್ದಿಕ್ ಹಾಸ್ಯಾಂಗಾರ್ ತೊ ಮಹಾನ್
ವಿನೋದಾ-ದೆಣೆಂ ದಿಲಾಂ ತಾಕಾ ದೆವಾನ್
ವಾಂಟುನ್ ಘೆತಾ ತೊ ಸರ್ವಾಂ ಸಂಗಿಂ ಮೊಗಾನ್
ಆನಿಕೀ ಮೆಳೊಂದಿತ್ ತಾಕಾ ಪುರಸ್ಕಾರ್ - ಸನ್ಮಾನ್

ಕೊಂಕಣಿ ಕೊಮೆಡಿಚೊ ಬಳಾದೀಕ್ ವಾಸೊ
ಹರ್ಯೆಕ್ಲ್ಯಾಚಾ ತೊಂಡಾರ್ ಫಾಂಕಯ್ಲೊ ಹಾಸೊ
ಕಾಣಿಯೊ - ಕೊಮಿಕಾಂನಿ ವಾಂಟ್ಲಾ ಎಕೆಕ್ ಪೊಸೊ
ಬೂಕ್ ವಾಚುನ್ 'ಹಾಸಾನಾತ್ ಲ್ಲೊ ತೊ ಪಿಸೊ'

ಪ್ರಥಮ್ ಪುಸ್ತಕ್ ತಾಚೆಂ 'ಫುಗೆಟ್ಯೊ'
ಹಾಸ್ತಾತ್ ದಾಂತ್ ನಾತ್ ಲ್ಲ್ಯೊ ಮಾತಾರ್ಯೊ ಮುರ್ಕುಟ್ಯೊ
ವಾಚುನ್ ವಾಚುನ್ ವಿಸರ್ತಾತ್ ಹಾತಾಂತ್ಲ್ಯೊ ಪೆಕೆಟ್ಯೊ
ಕಾಮೆಲಿ ಕೆದ್ನಾಂಯ್ ಖುಶಾಲಿ - ನಿಯಾಳ್ತಾನಾ ಪಟಾಕ್ಯೊ

ವಾಚುನ್ ಹಾಸೊನ್ ತಾಚಿಂ ಫೊಕಣಾಂ
ಗಲ್ಫಾಂತ್ ಆನಿ ಅಖ್ಖ್ಯಾ ಕೊಂಕಣಾಂ
ವಿಸ್ರೊನ್ ಗೆಲ್ಯಾಂತ್ ಜೆವ್ಣಾಂ - ಖಾಣಾಂ
ಸರ್ವಾಂಚಿಂ ಪೊಟಾಂ ದಾದೊಶಿ ಬಾಣಾಂ

ಪರ್ಗಟ್ ಕೆಲಾಂ ಪುಸ್ತಕ್ 'ಗ್ರಹಚಾರ್'
ಆಸಾತ್ ಹಾಂತುಂ ಬರೆ ವಿನೋದಿಕ್ ವಿಚಾರ್ 
ಕೊಂಕ್ಣಿ ಬಾಂಗಾರಾನ್ ಹಾಸ್ಯಾಚೆ ನಗ್ ಕರ್ಚೊ ಆಚಾರ್ 
ವಾಚ್ತಾನಾ ಹಾಸೊ ದವರುಂಕ್ ಜಾಯ್ನಾ ಫಿಚಾರ್ 

ಪೈಶೆ ದೀವ್ನ್ ಚುರ್ಚುರ್ನಾಸ್ತಾಂ ವಾಚ್ಯೆತ್ ಸುರ್ಸುರ್ಯೊ 
ಬಿಲ್ಕುಲ್ ಪಿಯೆಂವ್ಚಿ ಗರ್ಜ್ ನಾ ಸುರ್ - ಸೊರೊ
ನಿವಾರ್ತಾ ಪೊಟಾಂತ್ಲೊ ಮೊಸ್ರಾಚೊ ಮುರ್ಮುರೊ
ಪೈಸಾ ವಸೂಲ್ - ಕಿತ್ಲೆಂ ವಾಚ್ಲ್ಯಾರೀ ಜಾಯ್ನಾ ಪುರೊ 

ಮಿತ್ರಾ ಸಿಜ್ಯೆಸಾ - ಹೆಂ ವಾಚ್ ಲ್ಲೆಂಯ್ ತ್ಯಾ ದಿಸಾಂನಿ 
ಮ್ಹಳ್ಳೆಂಯ್ ತುಂವೆಂ ಸಂತೊಸಾಚಾ ಉಮಾಳ್ಯಾಂನಿ 
"ಮ್ಹಜ್ಯಾ ಮರ್ಣಾ ಉಪ್ರಾಂತ್ಲ್ಯಾ ದಿಸಾಂನಿ 
ಫಾಯ್ಸ್ ಜಾಂವ್ದಿ ಕೊಂಕ್ಣಿ ಪತ್ರಾಂನಿ"

- ಜೋಸೆಫ್ ಕರ್ನೆಲಿಯೊ, ಕೊಂಚಾಡಿ ವಯ್ಲೊ ವಾಡೊ