ದಿವೊ ಪಾಲ್ವಂವ್ಚ್ಯಾ ಫುಡೆಂ by ಫೆಲ್ಸಿ ಲೊಬೊ Back

ದಿವೊ ಪಾಲ್ವಂವ್ಚ್ಯಾ ಫುಡೆಂ
-----------------------------------

ತಿ, ದಿವೊ ಜಾವ್ನ್ ಜಳ್ಳಿ
ಘರ್ಚೊ, ಸೆಜಾರ್ಚೊ, ಗಾಂವ್
ಸಮಾಜ್ ದೇಶಾಚೊ.
ತಿ, ಪುನ್ವೆ ಚಂದ್ರ್ ಜಾಲಿ
ಮೊಗಾ ಥಂಡಾಯೆ ಚಾಂದ್ನೆಂ
ಫಾಂಕಯಿತ್ ಗೆಲಿ.
ತಿ, ಸುರ್ಯಾಕ್ ನ್ಹೆಸ್ಲಿ
ಜೀವ್ ದೀತ್ತ್ ಊಭ್ ಚರಯಿತ್ ಗೆಲಿ.
ತಿ, ದಿವೊ ಜಾವ್ನ್ ಜಳ್ಳಿ
ಘರ್ಚೊ, ಸೆಜಾರ್ಚೊ, ಗಾಂವ್
ಸಮಾಜ್ ದೇಶಾಚೊ.

ಘರ್ಚ್ಯಾ ಕುಡಾಂ ಕುಡಾಂನಿ
ಜನ್ಲಾ ಬಾಗ್ಲಾ ವೊಣ್ತಿ ಹುಂಬ್ರಾರಿ
ಉತ್ರೊನ್ ಸೊಪೊ, ಆಂಗಣ್
ತಿ ದಿವೊ ಜಾವ್ನ್ ಜಳ್ಳಿ
ಸೆಜ್ರಾ ಗಾಂವಾ  ದೇಶಾರಿ

ದಿವೆ ತಿಚೆ ಜಳ್ಳೆ ತುಳ್ಸಿ ಕಾಟ್ಯಾರಿ
ಘರಾ ಹುಂಬ್ರಾ, ದೆವಾ ಆಲ್ತಾರಿ
ಕುಡಾಂ ಮೂರ್ತಿ ಆನಿ ಖುರ್ಸಾರಿ
ಸೊಭಾಯೆ ಹಾಸೊ ದೀತ್ತ್
ತೆ ಮಿಣ್ಕೊನ್ ವಿರ್ಲೆ
ದಿವೊ ಜಳಂವ್ಚ್ಯಾ ತಿಚೆ ಭಿತರ್ ಮಾತ್ರ್
ಕೆನ್ನಾ ಕೆನ್ನಾ ಉಬ್ದೆಸಾಂಚೆಂ
ಝೊಡ್ ವಾರೆಂ ಉಸ್ಮೊಡ್ಲೆಂ.

ತುಮ್ಚೆ ಭಿತರ್ ಪಾಸಾಯೊ ಮಾರ್ಚ್ಯಾ
ಕಾಳ್ಯಾ ಅಂಧ್ಕಾರಾಕ್ ಮಾತ್ಶೆಂ
ಕಾಡಿ ಪೆಟವ್ನ್ ಜಳವ್ನ್ ಉಡಯಾ
ಘರಾ, ಸೆಜ್ರಾ, ಗಾಂವಾರ್ ದೇಶಾಂತ್
ತಿಕಾ, ಮನ್ಶ್ಯಾಪಣಾಲೆ
ದಿವೆ ಜಳಂವ್ಕ್ ಸೊಡಾ
ತೆಂಪ್ಲಾಂ, ರಾನಾಂ, ಮಯ್ದಾನಾಂ
ರಸ್ತ್ಯಾ, ಲೊಡ್ಜಾಂನಿ
ತಿಕಾ ಪಾಲ್ವಂವ್ಚೆಂ ಧಯ್ರ್
ಪರತ್ ಜಾಗ್ಚೆಂ ನಾಕಾ.....
ತಿ... ಉಜೊ ಜಾಲಿ ತರ್ ಕಷ್ಟ್...!

        ಫೆಲ್ಸಿ ಲೊಬೊ / ದೆರೆಬಯ್ಲ್.