ತುಜ್ಯಾ ಯಾದಿಂಚಿಂ ಚಿತ್ರಾಂ By ಫೆಲ್ಸಿ ಲೋಬೊ Back

ತುಜ್ಯಾ ಯಾದಿಂಚಿಂ ಚಿತ್ರಾಂ

ತೊ------
ಮಾಂಯ್ಚ್ಯಾ ಬಗ್ಲೆಚೊ ಬಳಾಧಿಕ್ ಖಾಂಬೊ
ಕುಟ್ಮಾ ರಥಾಚೆಂ ಘನಾಚೆಂ ರೋದ್
ಅನಿತಿಲಾಗಿಂ ಝುಜ್ಲಲೊ
ಅನ್ನ್ಯಾಯ್ ಭಗ್ತಾಂ ವಡಾನ್ ರಡ್ಲಲೊ
ಗಂಭಿರಾಯೆಚ್ಯಾ ವೊರ್ಲಾನ್
ಗುಟ್ಲಾಯಿಲ್ಲ್ಯಾಲೊಣ್ಯೆಸಾರ್ಕ್ಯಾ
ಕಾಳ್ಜಾಚೊ ಬಾಬ್ ಮ್ಹಜೊ

ತಾಚ್ಯಾ ಮೊಗಾಚಿ ಭಾಸ್ ಚ್ಚ್ ವೆಗ್ಳಿ
ಮೊನೆಪಣಾಂತ್ ಪಾಂಗುರ್ಲೆಲಿ
ಘಟ್ ಬಾವ್ಳ್ಯಾಂ ಪಂದಾಕ್
ಸಾ-ತಾಟ್ ಬಾಳಾಂಕ್ ರಾಕ್ಚ್ಯಾ
ಭಡ್ವ್ಯಾಕ್ ಗಾಂವ್ ಭರ್ ಮಾನ್
ಮೆಳ್ತಾಲೊ ಕುಟ್ಮಾಂತ್ ಸದಾಂ ಸನ್ಮಾನ್

ಸೊಪ್ಯಾ ಪೊಂತಾಲ್ಯಾ ವೊಣ್ತಿರ್
ವೊಣ್ಕೊಂಚ್ಯಾ ಪಾಟಿನ್
ಖ್ಹುರು ಸೊಡ್ಲೆಲಿ
 ಮೊಜ್ಯಾ ಯಾದಿಂನಿ ಗ್ರಾಸಿಲ್ಲಿ
ಆಮೊರಿ ತೆರ್ಸಾ ಕಂತಿಗೆಕ್
ಸುಖ್ ದುಖಾಚ್ಯಾ ಉಲ್ಯಾಂಕ್
ಕೆನ್ನಾಂ ಸೊಪೊ ಆನಿ ವೊಣದ್
ಕಾನ್ ಜಾತಾಲಿಂ

ತೆಲ್ತೆಂ ಜಾಲ್ಲೆಂ ಕೊಯ್ತೆ ಥೊರುಂ
ಝರೊನ್ ಪರ್ಜಳ್ಚೆಂ ಖೊರೆಂ ಪಿಕ್ಕಾಸ್
ತಾಚ್ಯಾ ಲಾಂಬ್ ವಾವ್ರಾಕ್ ಆರ್ಸೊ ಧರ್ತಾಂ
ಕಪಾಲಾ ಥಾವ್ನ್ ಝಡ್ಲೆಲ್ಯಾ
ಘಾಮಾಥೆಂಬ್ಯಾಂಚಿ ರೂಚ್ ಚಾಕೊನ್
ಕಿರ್ಲಾಲ್ಲಿಂ ಭಾತಾಂ ಕಣ್ಶಿ ಜಾವ್ನ್
ಗಾದ್ಯಾಂನಿ ಮಾನ್ ಭಾಗಾಯ್ತಾಲಿಂ

ಜವಾಬ್ದಾರೆಚ್ಯಾ ವಜಾನಾ ಪಂದಾ
ಜಿರಾನಾಸ್ಲೆಲ್ಯಾ ಕುಡಿನ್ ತಾಚ್ಯಾ
ಜರಯಿಲ್ಲ್ಯಾ ವಾಟೆಚೆಂ
ಕಾಡಿತ್ ಕೋಣ್ ಝೋಕ್?
ಕೆನ್ನಾಂ ಕಷ್ಟಾಂ ನಷ್ಟಾಂನಿ ಆಡ್ಚುನ್
ಧರ್ತಾನಾ ಆರ್ಣಿಲ್ಲ್ಯಾ ಮುಟಿಂನಿ
ಗಿಳ್ ಲ್ಲೆಂ ಆಸಾ ಜಬ್ಬೊರ್ ದೂಖ್

ವರ್ಸಾಂ ಉತ್ರಾಲ್ಯಾಂತ್
ಯಾದಿ ಮಾಜ್ವಾನಾಂತ್
ಪೆಟೆಚೆಂ ಧಾಂಪ್ಣೆ ಧಾಂಪ್ತಾನಾ
ಕುಟ್ಮಾ ಭಾಂದ್ ತುಟ್ಲಾ ತರಿ
ಮೊಗಾ ಯಾದಿಂಚ್ಯಾ ಫಿಂತಾನಿಂ
ಆಜೂನ್ ಧರ್ಲಾ ಅರ್ಣುನ್
ಪಾವ್ಲಾಂ ಹಿಂ ಗಾದ್ಯಾ ಮೆರಾಂಚೊ
ಸ್ಪರ್ಶ್ ಘೆತಾನಾ 
ತರ್ನ್ಯಾ ಬೊಟಾಂನಿ ಉದ್ಕಾ ಕೊಳ್ಶೆ
ಪೊಶೆತಾನಾ
ನಾಂಗೊರ್ , ಝೂಂವ್ , ರೆಡ್ಯಾಂ ಬೊಡಿ
ಆಪಡ್ತಾನಾ
ವಾಳ್ಚೆಂ ವಾರೆಂಯ್ ಉಲಂವ್ಕ್ ಲಾಗ್ಲಾಂ
ಬಾಬಾಚ್ಯಾ ಮೊಗಾ ಯಾದಿಂಚಿಂ
ಚಿತ್ರಾಂ ಕಾಳ್ಜಾ ವೊಣ್ತಿರ್
ಪಿಂತ್ರಾಂವ್ಕ್ ಲಾಗ್ಲಾಂ.

 ಫೆಲ್ಸಿ ಲೋಬೊ | ದೆರೆಬಯ್ಲ್