ಭುರ್ಗಿಂ ತಾಂಚೆ ಶಿಕಾಪ್, ಆನಿ ವ್ಹಡಿಲಾಂಚಿ ಜವಾಬ್ದಾರಿ By Renita Dcosta Back
ಭುರ್ಗಿಂ ತಾಂಚೆ ಶಿಕಾಪ್, ಆನಿ ವ್ಹಡಿಲಾಂಚಿ ಜವಾಬ್ದಾರಿ
ಕೊರೊನಾ ಪಿಡೆಂತ್ ಸಂಸಾರ್ ಕಷ್ಟಾತಾನಾ ಪಿಡಾ ವಿಸ್ತರ‍್ತಾ ಮ್ಹಳ್ಳ್ಯಾ ಭಿಯಾನ್ ಸರ್ಕಾರಾನ್ ಲಾಕ್‌ಡೌನ್ ಕೆಲ್ಲ್ಯಾ ನಿಮ್ತಿಂ ಸರ್ವಾಂಚ್ಯಾ ಜಿವಿತಾ ವಯ್ರ್ ವರ್ತೊ ಪ್ರಭಾವ್ ಪಡ್ಲಾ. ಭುರ್ಗ್ಯಾಂಚ್ಯಾ ಶಿಕ್ಪಾ ವಯ್ರ್ ವರ್ತೊ ಪರಿಣಾಮ್ ಜಾಲಾ. ಭುರ್ಗ್ಯಾಂಕ್ ಇಸ್ಕೊಲಾಕ್ ವಚುಂಕ್ ಜಾಯ್ನಾತ್ಲ್ಯಾನ್ ಆನ್‌ಲೈನ್ ಶಿಕ್ಪಾ ಮುಖಾಂತ್ರ್ ಭುರ್ಗ್ಯಾಂಕ್ ಶಿಕಾಪ್ ಶಿಕೊಂಕ್ ಸಾಧ್ಯ್ ಜಾಲಾ. ಹ್ಯಾ ಆನ್‌ಲೈನ್ ಶಿಕ್ಪಾ ಖಾತಿರ್ ಭುಗ್ಯಾಂಕ್ ವ್ಹಡಿಲಾಂನಿ ಮೊಬಾಯ್ಲ್ ಆನಿ ಲ್ಯಾಪ್‌ಟೊಪ್ ದೀಜಾಯ್‌ಚ್ ಪಡ್ಲಾಂ.
ಶಿಕ್ಷಕ್ ಆನ್‌ಲೈನಾರ್ ಶಿಕಾಪ್ ಶಿಕಾಯ್ತಾನಾ ಭುರ್ಗ್ಯಾಂನಿ ಮತ್ ದೀವ್ನ್ ಆಯ್ಕಾಶೆಂ ಕರ್ಚಿ ವರ್ತಿ ಜವಾಬ್ದಾರಿ ವ್ಹಡಿಲಾಂಚಿ ಜಾವ್ನಾಸಾ. ಆಫ್‌ಲೈನಾರ್ ನೋಟ್ಸ್ ಆನಿ ವಿಡಿಯೋ ಶಿಕ್ಷಕಾಂನಿ ದಾಡ್ತಾನಾ, ನೋಟ್ಸ್ ಬರವ್ನ್ ಆನಿ ವಿಡಿಯೋ ಪಳೆವ್ನ್ ಭುರ್ಗ್ಯಾಂನಿ ಶಿಕಾಜಯ್ ಪಡ್ತಾ. ಹೆಂ ಭುರ್ಗ್ಯಾಂನಿ ಕರಿಶೆಂ ಪಳೆಂವ್ಚೆ ಕಾಮ್ ವ್ಹಡಿಲಾಂಚೆ ಜಾವ್ನಾಸಾ.
ಹರ‍್ಶೆಂ ಇಸ್ಕೊಲಾಂತ್ ಭುರ್ಗ್ಯಾಂಚೆ ನೋಟ್ಸ್ ಬರವ್ನ್ ಜಾತಾಲೆಂ. ಆನಿ ಶಿಕ್ಪಾಚೆಂ ಪುನರಾವರ್ತನ್ ಯೀ ಇಸ್ಕೊಲಾಂತ್ ಶಿಕ್ಷಕಾಂ ಕರಯ್ತಾಲಿ ಪೂಣ್ ಆತಾಂ ಪರಿಸ್ಥಿತಿ ಬದಲ್ಲ್ಯಾ. ಭುರ್ಗ್ಯಾಂನಿ ನೋಟ್ಸ್ ಪುರ್ತೆಂ ಬರಯ್ಶೆಂ ಕರ್ಚೆಂ ಕಾಮ್‌ಚ್ ವ್ಹಡ್ ತ್ರಾಸಾಚೆಂ ಜಾಂವ್ಕ್ ಪಾವ್ಲಾಂ. ನೋಟ್ಸ್ ಬರವ್ನ್ ಪುನರಾವರ್ತನ್ ಕರ‍್ತಾನಾ ವ್ಹಡಿಲಾಂಕ್ ಪುರೊ ಪುರೊ ಜಾತಾ.
ಭುರ್ಗ್ಯಾಂಕ್ ಇಸ್ಕೊಲಾಕ್ ವೆತಾನಾ ಸಾಂಗಾತ್ಯಾಂ ಸಂಗಿಂ ಹಾಸೊನ್ ಖೆಳೊನ್ ಶಿಕಾಪ್ ಶಿಕ್ತಾನಾ ಆಸ್ಚಿ ತಿ ಉರ್ಬಾ ಆತಾಂ ತಾಂಚೆ ಥಂಯ್ ದಿಸಾನಾ. ಭುರ್ಗಿಂ ಆತಾಂ ಬಾವ್ಡಿಶಿಂ ಜಾಲ್ಯಾಂತ್ ತಾಂಕಾ ಕೆದಾಳಾ ಇಸ್ಕೊಲ್ ಪರ್ತುನ್ ಸುರು ಜಾಯ್ತ್ಗಿ ಮ್ಹಣ್ ತಿಂ ರಾಕೊನ್ ರಾವ್ಲ್ಯಾಂತ್. ಇಸ್ಕೊಲಾಕ್ ವಚುಂಕ್ ಸಳ್ ಕರ‍್ಚಿಂ ಭುರ್ಗಿಂ ಸಯ್ತ್ ಕೆದಾಳಾ ಇಸ್ಕೊಲ್ ಉಗ್ತೆಂ ಜಾತಾಗೀ ಮ್ಹಳ್ಳ್ಯಾ ಅತ್ರೆಗಾನ್ ರಾಕೊನ್ ರಾವ್ಲ್ಯಾಂತ್.
ಆವಯಾಂಕ್ ಆತಾಂ ವರ್ತೊ ಜವಾಬ್ದಾರಿ ಆಸಾ. ತಿಂ ಕೇವಲ್ ಆವಯ್ ನಾಸ್ತಾಂ ಶಿಕ್ಷಕಿ ಜಾವ್ನ್ ಸದಾನೀತ್ ಭುರ್ಗ್ಯಾಂನಿ ಶಿಕಾಶೆಂ ಪಳೆಂವ್ಚೆ ಕಾಮ್ ತಾಂಚೆ ಜಾಲಾಂ. ಭುರ್ಗ್ಯಾಂಚಿ ಪರೀಕ್ಷಾಯೀ ಆನ್‌ಲೈನೆರ್ ಆಸಲ್ಲ್ಯಾನ್ ತಾಣಿಂ ಪಳೆವ್ನ್ ಬರಯ್ನಾಶೆಂ ಚತ್ರಾಯ್ ಘೆಂವ್ಕ್ ಆಸಾ. ಜರ್ ಘರಾ ಥಾವ್ನ್ ಪರೀಕ್ಷಾ ಬರಂವ್ಚೆಂ ಮ್ಹಣ್ ಭುರ್ಗ್ಯಾಂಕ್ ಶಿಕಯ್ನಾಶೆಂ ಪಳೆವ್ನ್ ಬರಂವ್ಕ್ ಆವ್ಕಾಸ್ ಕರ‍್ನ್ ದಿಲ್ಲಾö್ಯರ್ ಭುರ್ಗ್ಯಾಂಕ್ ಶಿಕ್ಪಾ ಥಂಯ್ ಆಸ್ಚಿ ಉರ್ಬಾ ಉಣೆ ಜಾತಾ. ಪಾಟ್ಲ್ಯಾ ಏಕಾ ವರ್ಸಾ ಆನಿ ಹ್ಯಾ ವರ್ಸಾಯೀ ಭುರ್ಗ್ಯಾಂಕ್ ಶಿಕಾಪ್ ಶಿಕೊಂಕ್ ಉತ್ತೇಜನ್ ದೀನಾತ್ಲ್ಯಾರ್ ಭುರ್ಗ್ಯಾಂಕ್ ಇಸ್ಕೊಲ್ ಸುರು ಜಾತಾನಾ ಮಸ್ತ್ ತ್ರಾಸ್ ಜಾತಾ. ದೆಕುನ್ ವ್ಹಡಿಲಾಂನಿ ಭುರ್ಗ್ಯಾಂಕ್ ಪರೀಕ್ಷಾ ಆಸ್ತಾನಾ ಬರೆಂ ಕರ‍್ನ್ ಶಿಕೊನ್ ಪರೀಕ್ಷಾ ಬರಯ್ಶೆಂ ಪ್ರೇರಣ್ ದೀಂವ್ಕ್ ಆಸಾ.
ಲ್ಹಾನ್ ಭುರ್ಗ್ಯಾಂಕ್ ಆನ್‌ಲೈನ್ ಕ್ಲಾಸ್ ಆಸ್ತಾನಾ ತಾಂಚೆ ಸಾಂಗಾತಾ ವ್ಹಡಾಂನಿ ಬಸ್ಚೆಂ ಅನಿವಾರ್ಯ್ ಜಾತಾ. ಶಿಕ್ಷಕಿ ಶಿಕಯ್ತಾನಾ ತಿಕಾ ತೊಂದ್ರೆ ದೀನಾಸ್ತಾನಾ ಸಮಧಾನೆನ್ ತಿಕಾ ಆಯ್ಕುನ್ ಮಾಗಿರ್ ಭುರ್ಗ್ಯಾಂಕ್ ಬರ‍್ಯಾ ಥರಾನ್ ಶಿಕಂವ್ಕ್ ಸಾಧ್ಯ್ ಆಸಾ. ಆನ್‌ಲೈನ್ ಕ್ಲಾಸಿರ್ ಶಿಕಾಪ್ ಭುರ್ಗ್ಯಾನ್ ಚೀತ್ ದೀವ್ನ್ ಆಯ್ಕೊಂವ್ಚಾ ಬರಿಂ ಕರ್ಚೆಂ ಸ್ಹ ಕಾಮ್ ವ್ಹಡಿಲಾಂಚೆ. ಆತಾಂ ತೆಂ ಶಿಕ್ಪಾಕ್ ವಾಪರ‍್ಚೆಬರಿ ಕರ್ಚೆಂ ಮಸ್ತ್ ತ್ರಾಸಾಚೆ ಕಾಮ್ ಜಾವ್ನಾಸಾ.
ಆತಾಂ ಆವಯೊ ಭುರ್ಗ್ಯಾಂಕ್ ಕೇವಲ್ ಶಿಕಾಪ್ ಮಾತ್ರ್ ನಂಯ್ಲಆಸ್ತಾ ಇತರ್ ಗರ‍್ಜೆಚೆಂ ವಿಷಯ್ ಶಿಕವ್ಚಾಂತ್ ಮಗ್ನ್ ಜಾಲ್ಯಾಂತ್ . ಕಿತ್ಯಾಕ್ ಕೇವಲ್ ಶಿಕಾಪ್ ನಹಿಂ ಆಸ್ತಾಂ ಭುರ್ಗ್ಯಾಂಕ್ ಮನೋರಂಜನ್ ಯೀ ಗರ್ಜ್ ಆಸಾ. ತಾಂಚ್ಯಾ ಕುಡಿಕ್ ತಶೆಂಚ್ ತಾಂಚ್ಯಾ ಮತಿಕ್ ಕಾಮ್ ದೀಂವ್ಕ್ ಆಸಾ. ದುಸ್ರ್ಯಾಂ ಸಾಂಗಾತಾ ಮೆಳೊನ್ ಖೆಳೊಂಕ್ ಜಾಯ್ನಾ ಜಾಲ್ಲ್ಯಾನ್ ಘರಾ ಭಾವಾಭಯ್ಣಿ ಸಾಂಗಾತಾ ಖೆಳಾಜಾಯ್ ಪಡ್ತಾ. ಪೂಣ್ ಘರಾಂತ್ ಭುರ್ಗೊ ಎಕ್ಲೊಚ್ ಆಸ್ತಾನಾ ತಾಚ್ಯೆ ಆವಯ್ ಬಾಪಾಯ್ ಜರ್ ಭುರ್ಗ್ಯಾಂ ಸಾಂಗಾತಾ ಖೆಳ್ನಾಂತ್ ತರ್ ತ್ಯಾ ಭುರ್ಗ್ಯಾಕ್ ನಿರಾಸ್ ಜಾಂವ್ಚೆ ಖಂಡಿತ್.
ದಿಸಾಕ್ ತೀನ್ ಚಾರ್ ಘಂಟೊ ತರೀ ಭುರ್ಗ್ಯಾಂಕ್ ಖೆಳ್ ವಾ ಇತರ್ ಮನೋರಂಜನೆಚಿ ಗರ್ಜ್ ಆಸ್ತಾ. ಪೂಣ್ ಹ್ಯಾ ಲೊಕ್‌ಡೌನ್ ನಿಮ್ತಿಂ ಭುರ್ಗ್ಯಾಂಕ್ ಹೆಂ ಮೆಳನಾಸ್ತಾನಾ ತಾಂಚಿ ದೈಹಿಕ್ ಆನಿ ಮಾನಸಿಕ್ ವಾಡಾವಳ್ ಫಾವೊತಿ ಬರಿ ಜಾಯ್ನಾ. ಘರಾ ಬಸುನ್ ಪೊಟಾಕ್ ಖೆಲ್ಲ್ಯಾನ್ ಪೊಟ್ ಮಾತ್ರ್ ವಾಡ್ಲಾಂ.
ಕೊರಾನಾ ಪಿಡೆನ್ ಆನಿ ಇಲ್ಲೊ ತೇಂಪ್ ಆಮ್ಕಾಂ ಕಷ್ಟೊಂಚೆ ಖಂಡಿತ್, ಜಾಲ್ಲ್ಯಾನ್ ಆಮಿಂ ಹಿ ಪಿಡಾ ಆಸ್ತಾನಾಂಚ್ ಆಮ್ಕಾ ಭಲ್ಕಾಯ್ಕೆಭರಿತ್ ದವರ್ನ್ ಆಮ್ಚೆ ದೀಸ್ ಬರ‍್ಯಾ ಥರಾನ್ ಕಶೆಂ ಪಾಚಾರ್ ಕರ‍್ಯೆತ್, ಭುರ್ಗ್ಯಾಂಕ್ ಆಮ್ಚಾ ಕಶೆಂ ನವೆಂ ಶಿಕೊಂಕ್ ಪ್ರೇರೇಣ್ ಕರ‍್ಯೆತ್ ಮ್ಹಳ್ಳೆ ವಿಶಿಂ ನಿಯಾಳ್ ಕರುಂಕ್ ಜಾಯ್.
ಲ್ಹಾನ್ ಭುರ್ಗ್ಯಾಂಕ್ ಖಂಚ್ಯಾ ವಿಷಯಾಂತ್ ಆಸಕ್ತ್ ಆಸಾ ಮ್ಹಳೆಂ ಸಮ್ಜುನ್ ಘೆಂವ್ಚೆ ದೆಕಿತ್ ಭುರ್ಗ್ಯಾಕ್ ಜರ್ ಸಂಗೀತಾಂತ್ ಆಸಕ್ತ್ ಆಸಾ ತರ್ ತಾಕಾ ಆನ್‌ಲೈನೆರ್ ಸಂಗೀತ್ ಶಿಕ್ಚಾಕ್ ಪ್ರೇರಣ್ ದಿಂವ್ಚೆ ತಶೆಂಚ್ ವ್ಹಡಾ ಭುರ್ಗ್ಯಾಂಕ್ಯೀ ತಾಂಕಾ ಆಸಕ್ತ್ ಆಸ್ಲ್ಯಾ
ವಿಷಯಾಚೆರ್ ಆನ್‌ಲೈನೆರ್ ಮಾಹೆತ್ ಘೆಂವ್ಕ್ ಅನುಕೂಲ್ ಕರ್ಚೆಂ.
ಆತಾಂ ಮೆಳ್‌ಲ್ಲೊ ಹೊ ವೇಳ್ ಅರ್ಥಾಭರಿತ್ ಥರಾನ್ ಖರ್ಚುಂಕ್ ವ್ಹಡಿಲಾಂನಿ ಪ್ರೇರೇಪಣ್ ದಿಲ್ಯಾರ್ ಮಾತ್ರ್ ಹೊ ಅಮೂಲ್ಯ್ ವೇಳ್ ಪಾಡ್ ಜಾಯ್ನಾಸ್ತಾನಾ ಬರ‍್ಯಾ ಥರಾನ್ ವಾಪಾರುಂಕ್ ಸಕ್ತೆಲ್ಯಾಂವ್.
By Renita Dcosta | Akashbhavan Ward
