ಕೊಂಕ್ಣೆಚಿ ‘ಅಸ್ಮಿತಾಯ್’ ಉರಯಾ... Back

ಕೊಂಕ್ಣೆಚಿ ‘ಅಸ್ಮಿತಾಯ್’ ಉರಯಾ ಮ್ಹಣ್ತಾ ಹೆರಿ ಪ್ರವೀಣ್ ಕೊರೆಯಾ

ಕೊಂಕ್ಣಿ ಕಲಾ ಸಂಸಾರಾಂತ್ ಆಯ್ಲೆವಾರ್ ದೆರೆಬೈಲ್ ಫಿರ್ಗಜೆಚೆಂ ನಾಂವ್ ಪರ್ತ್ಯಾನ್ ಪಾಟಾಪಾಟ್  ಪರ್ಜಳೊಂಕ್ ಲಾಗ್ಲೆಂ.

‘ಕೊಮೆಡಿ ಕಂಪೆನಿ’ ಮಂಗ್ಳುರ್ ಹಾಣಿಂ ಡೊನ್ ಬೊಸ್ಕೊ ಸಾಲಾಂತ್ ಮಾಂಡುನ್ ಹಾಡ್ಲೆಲ್ಯಾ ‘ಕರ್ ನಾಟಕ್’ ಉತ್ಸವಾಂತ್ ಮಾಲ್ಗಡ್ಯಾ ಧಾ ನಾಟಕಿಸ್ತಾಂಕ್ ಹೃದಯ್ ಸ್ಪರ್ಶಿ ಸನ್ಮಾನ್ ಭೆಟಯ್ಲೊ. ಎಕ್ಲೊ ಸವ್ಯಸಾಚಿ ಸಾಹಿತಿ ರಿಚ್ಚಿ ಪಿರೇರ್ ಆನ್ಯೇಕ್ಲಿ ಫಾಮಾದ್ ನಟಿ – ಪ್ರಾದ್ಯಾಪಕಿ – ಪ್ರಿನ್ಸಿಪಾಲ್ ಮಾನೆಸ್ತಿಣ್ ಕಾರ್ಮೆಲಿಟಾ ಡಿಸೋಜ್ (ಗೋವಿಯಸ್) ದೊಗಾಂ ದೆರೆಬೈಲ್-ಗಾರಾಂ.

ಉಪ್ರಾಂತ್ ಆಯ್ಲಿ ಆನ್ಯೇಕ್ ಕುರ್ಕುರಿತ್ ಖಬಾರ್. ‘ಅಸ್ಮಿತಾಯ್’ ಕೊಂಕ್ಣಿ ಸಿನೆಮಾಂತ್ ದೆರೆಬೈಲ್ಚೊ ಕಲಾಕಾರ್ ವಿಂಚುನ್ ಆಯ್ಲೊ. ‘ಗಲ್ಫ್ ವೋಯ್ಸ್ ಒಫ್ ಮ್ಯಾಂಗಲೋರ್’ ಪ್ರಶಸ್ತಿ ವಿಜೇತ್ ಗಾಯಕ್ – ಸಂಗೀತ್ ಗಾರ್ ಮಾನೆಸ್ತ್ ಹೆರಿ ಪ್ರವೀಣ್ ಕೊರೆಯಾ. ದೆರೆಬೈಲ್ ಇಗರ್ಜೆ ಲಾಗ್ಚ್ಯಾ ಬ್ರಿಗೇಡ್ ವಾಡ್ಯಾಗಾರಾಂನಿ ಆಪ್ಲ್ಯಾ ಚೆಪ್ಯಾಕ್ ಏಕ್ ಚಡಿತ್ ಪಾಕ್ ಚಡಯ್ಲೆಂ.

ಲುವಿ ಪಿಂಟೊನ್ ನಿರ್ಮಾಣ್ ಕೆಲ್ಲೆಂ, ‘ಮಾಂಡ್ ಸೊಭಾಣ್’ ಸಂಸ್ಥ್ಯಾಚೆಂ ಫಿಲ್ಮ್ ‘ಅಸ್ಮಿತಾಯ್’ ಹಾಂತುಂ ಹೆರಿಚೊ ಪಾತ್ರ್ ಲ್ಹಾನ್ ತರೀ – ಸಿನೆಮಾಚ್ಯಾ ಕಾಣಿಯೆಕ್ ಗಾಂಚ್ ಗುಂತ್ಚೊ. ನಾಯಕ್ ನಟಾನ್ ಗೊಂಯಾಂ ಭಾಯ್ರ್ ವಚನಾಶೆಂ, ಗೊಂಯಾಂತ್-ಚ್ ತಾಕಾ ನಪಂಯ್ಚ್ ಕರ್ಚಿ ಶಿಂತ್ರ್ಯಾಳಿ ಕರ್ನಿ ಕರುಂಕ್ ‘ಸುಪಾರಿ’ ಕಾಣ್ಘೆಂವ್ಚೊ ವಿಲನ್ ಪಾತ್ರ್ ತಾಚೊ.

“ಅಸ್ಮಿತಾಯ್ ಬಿಗ್ ಬಜೆಟಿಚ್ಯಾ ಫಿಲ್ಮಾಂತ್ ಪಾತ್ರ್ ಘೆಂವ್ಚೆಂ ಚಾನ್ಸ್ ತುಕಾ ಕಶೆಂ ಮೆಳ್ಳೆಂ?” ಹಾಂವೆಂ ವಿಚಾರ್ಲೆಂ, ಮಾಗಿರ್ ಜೀಬ್ ಚಾಬ್ಲಿ. ಕಾರಣ್, ಹೆರಿ ‘ಪಯ್ಲ್ಯಾ ಪಿಂತುರಾಚೊ ಬುರ್ಗೊ’ ಮ್ಹಣ್ ಹಾಂವೆಂ ಚಿಂತ್-ಲ್ಲೆಂ.

ಹೆರಿ ಕೊರೆಯಾನ್ ತಾಚೆಂ ಸಿನೆಮಾ ಸಾಧನ್ ಸೊಡವ್ನ್ ಸಾಂಗ್ತಾನಾ ಮ್ಹಾಕಾ ಅಜಾಪ್ ಜಾಲೆಂ. ತಾಣೆಂ ಯೆದೊಳ್-ಚ್ ಪ್ರಖ್ಯಾತ್ ನಿರ್ದೇಶಕಾಂಚ್ಯಾ ಹಾತಾ ಖಾಲ್ 5 ಕನ್ನಡ ಆನಿ 2 ತುಳು ಸಿನೆಮಾಂನಿ ನಟನ್ ಕರ್ನ್ ಖ್ಯಾತಿ ಜೊಡ್ಲ್ಯಾ. ಎಕಾ ಕನ್ನಡ ಸಿನೆಮಾಕ್ ಖುದ್ದ್ ದುಡು ಗಾಲ್ನ್ ನಿರ್ಮಾಪಕಾಚೊ ಪಾಟ್ ಸೊಬಯ್ಲಾ.

ಮಾನೆಸ್ತ್ ಹೆರಿ ಏಕ್ ಪ್ರಖ್ಯಾತ್ ಗಾಯಕ್ ಮ್ಹಣೊನ್ ಕಿತ್ಲ್ಯಾ ಜಣಾಂಕ್ ಕಳಿತ್ ಆಸಾ? ಕೊಂಕ್ಣೆಂತ್ಲೊ ಪಯಿಲ್ಲೊ ವೀಡಿಯೊ ಮ್ಯೂಸಿಕ್ ಆಲ್ಬಮ್ “ಮೊಗಾಕ್ ಆಶೆತಾಂ” ಹಾಂತುಂ ತಾಚೊ ಮದುರ್ ತಾಳೊ ಸಬಾರಾಂಕ್ ರುಚ್ಲಾ. ಖ್ಯಾತ್ ಕವಿ ವಿಲ್ಸನ್ ಕಟೀಲಾಚಾ ಪದಾಂಕ್ ಹೆರಿಚೊ ತಾಳೊ ಸಮಾ ಬಸ್ಲಾ.

ಮ್ಹಜ್ಯಾ ಕುತೂಹಲ್ ಭರಿತ್ ಸವಲಾಂಕ್ ಹೆರಿನ್ ಆಪ್ಲೊ ಆದ್ಲೊ ಉಗ್ಡಾಸ್ ‘ರಿವೈಂಡ್’ ಕರ್ನ್, ಆಪ್ಲಿ ಕಲಾ ಚಟುವಟಿಕಾ ಬರವ್ನ್ ಕಾಣ್ಘೆಂವ್ಕ್ ಮಾಕಾ ಆವ್ಕಾಸ್ ಕರುನ್ ದಿಲೊ. ಹಾಂವೆಂ ಮ್ಹಜೆಂ ಪೆನ್ನ್ ಪಾಜ್ಲೆಂ.

ಹೆರಿನ್ ನಟನ್ ಕೆಲ್ಲಿಂ ಕನ್ನಡ ಪಿಂತುರಾಂ ಹಿಂ ಜಾವ್ನಾಸಾತ್:

೧. “ಕಥಾ ವಿಚಿತ್ರಾ” (ನಿರ್ದೇಶಕ್: ಅನೂಪ್ ಆಂಟನಿ)

೨. “ಬೀರ್ ಬಲ್” ಹೊರರ್ ಕ್ರೈಮ್ ಥ್ರಿಲ್ಲರ್ (ನಿರ್ದೇಶಕ್: ಎಂ. ಜಿ. ಶ್ರೀನಿವಾಸ್)

೩. “ಅದನ್ನೇನ್ ಕೇಳ್ತಿರಾ???” (ನಿರ್ದೇಶಕ್: ನಾಗೇಂದ್ರ ಅರಸ್ – ಸುಂದರಕೃಷ್ಣ ಅರಸಾಚೊ ಪೂತ್)

೪. “ಒಂದು ಸಿಲ್ಲಿ ಬ್ರೇಕಪ್ ಸ್ಟೋರಿ” (ನಿರ್ದೇಶಕ್: ಖ್ಯಾತ್ ಕೊಂಕ್ಣಿ ಕನ್ನಡ ಕವಿ ಅರ್ಜುನ್ ಲುವಿಸ್)

೫. ಅವಾರ್ಡ್ ವಿನ್ನರ್ ಡೈರೆಕ್ಟರ್ ‘ಮಾರಿಬಲೆ’ ಖ್ಯಾತೆಚೊ ಕೃಷ್ಣಪ್ಪ ಉಪ್ಪೂರು ಹಾಚೆಂ “ಮಹಾನದಿ” ಪ್ರಶಸ್ತಿ ವಿಜೇತ್ ಚಲನ್ ಚಿತ್ರ್.

ಫಾಮಾದ್ ಪತ್ರಕರ್ತ್ ಇಸ್ಮಾಯಿಲ್ ಮೂಡುಶೆಡ್ಡೆ ಹಾಚ್ಯಾ ನಿರ್ದೇಶನಾಚೆಂ “ಬೋಜರಾಜ್ M.B.B.S.“ ತುಳು ಸಿನೆಮಾಂತ್ ಏಕ್ ಪ್ರಮುಕ್ ಪಾತ್ರ್ ಹೆರಿನ್ ಆಪ್ಲ್ಯಾ ಸಹಜ್ ನಟನ್ ತಾಲೆಂತಾಂತ್ ಸೊಬಯ್ಲಾ.

ಇಜಯ್ ಫಿರ್ಗಜೆಂತ್ ವಸ್ತಿ ಕರುನ್ ಆಸ್-ಲ್ಲಿಂ ದೆ| ಸೆಲಿನ್ ಸಿಕ್ವೇರಾ ಆನಿ ದೆ| ಜೊಕಿಮ್ ಕೊರೆಯಾ ಹಾಂಚೊ ಎಕ್ಲೊಚ್ ಸುಪುತ್ರ್ ಹೆರಿ ಏಕ್ ‘ಚಟುವಟಿಕಾಂಚಿ ಕಾರಂಜಿ’ ಮ್ಹಳ್ಯಾರ್ ಅತಿಶಯ್ ಜಾಂವ್ಚೆಂನಾ. ಕೆದ್ಯಾ ವ್ಹಡ್ಲ್ಯಾ ಕಂಪೆನಿಂಚಾ ಇಂಟರ್-ವ್ಯೂವಾಂನಿ ಜಾಂವ್, ಸಿನೆಮಾಂಚಾ, ನಾಟಕಾಂಚಾ ವ ನಾಯ್ಟಾಂಚಾ ಆಡಿಶನಾಂನಿ ಜಾಂವ್ – ಪಯ್ಲ್ಯಾ ಹಂತಾರ್-ಚ್ ವಿಂಚುನ್ ಯೆಂವ್ಚೊ ಸಾಹಸಿ ತೊ. 

ಹೆರಿ ಪ್ರವೀಣ್ ಕೊರೆಯಾಕ್ ಸಿನೆಮಾಂನಿ ಆಸಕ್ತ್ ಉಬ್ಜಾಲ್ಲಿ ಕಾಣಿ ಬಾರಿಚ್ ಕೌತುಕೆಚಿ. ಹೆರಿಚಿ ಆವಯ್ ಸೆಲಿನ್ ಸಿಕ್ವೇರಾ, ಬೊಕ್ಕಪಟ್ಣ ಇಸ್ಕೊಲಾಂತ್ ಶಿಕ್ಷಕಿ ಜಾವ್ನಾಸ್-ಲ್ಲಿ. ತ್ಯಾಚ್ ಇಸ್ಕೊಲಾಂತ್ ಸಹ-ಶಿಕ್ಷಕ್ ಕೃಷ್ಣಪ್ಪ ಉಪ್ಪೂರು – ಲವ್ ಎಟ್ ಫರ್ಸ್ಟ್ ಸೈಟ್ ಮ್ಹಳ್ಳೆಬರಿ, ಪಯ್ಲೆ ಪಾವ್ಟಿಂಚ್ ಹೆರಿಕ್ ಪಳೆವ್ನ್ “ಆಪ್ಲ್ಯಾ ‘ಮಾರಿಬಲೆ’ ತುಳು ಫಿಲ್ಮಾಂತ್ ಪಾತ್ರ್ ದಿತಾಂ” ಮ್ಹಣೊನ್ ಸೆಲಿನ್ ಟೀಚೆರಿಲಾಗಿಂ ಪರ್ವಣ್ಗಿ ವಿಚಾರಿಲಾಗ್ಲೊ.

ಆಪ್ಲ್ಯಾ ದುವಾಂಕ್ ಸಿನೆಮಾ ಸಂಸಾರಾಕ್ ದಾಡುಂಕ್ ಆವಯ್-ಬಾಪಾಯಾಂನಿ ಬಿಯೆಂವ್ಚೆಂ ವಾಜ್ಬಿ. “ಆಪ್ಲ್ಯಾ ಪುತಾಕ್ ಮೆಳ್-ಲ್ಲೊ ಬರೊ ಆವ್ಕಾಸ್ ಟೀಚೆರಿನ್ ಕಿತ್ಯಾಕ್ ಹೊಗ್ಡಾಯ್ಲೊ?” ವಿಚಾರ್ಲೆಂ ಹಾಂವೆಂ ಆಸಕ್ತೆನ್.

“ಹಾಂವ್ ಆವಯ್-ಬಾಪಾಯ್ಚೊ ಎಕ್ಲೊಚ್ ಬುರ್ಗೊ. ಮಾಮ್ಮಿಕ್ ಮ್ಹಜೆರ್ ಬಾರಿಚ್ ಮೋಗ್ – ಕೊಂಡಾಟೊ. ಮಾಕಾ ಎಕ್ಲ್ಯಾಕ್ ಚ್ ಖಂಯ್ಸರೀ ಧಾಡುಂಕ್ ಬಿಯೆತಾಲಿಂ. 

‘ಮಾರಿಬಲೆ’ ಶೂಟಿಂಗಾಕ್ ವೆಚೊ ಆವ್ಕಾಸ್ ಚುಕ್ಲ್ಯಾರೀ, ಹೆರಿಕ್ ಸವ್ಕಾಸ್ ಸಿನೆಮಾ – ನಾಯ್ಟ್ – ನಾಟಕ್ – ಪ್ಲೇಬ್ಯಾಕ್ ಸಿಂಗಿಂಗ್ ಇತ್ಯಾದಿ ಕಲಾ ಚಟುವಟಿಕಾಂನಿ ಆಸಕ್ತ್ ಚಡ್ಲಿ. ‘ಮಾರಿಬಲೆ’ ಡೈರೆಕ್ಟರಾಚೆಂ ನವೆಂ ಕನ್ನಡ ಫಿಲ್ಮ್ “ಮಹಾನದಿ” ಶೂಟಿಂಗ್ ಸುರ್ವಾತ್ ಕರ್ತಾನಾ, ಉಪ್ಪೂರಾನ್ ವತ್ತಾಯೆನ್ ವೋಡ್ನ್ ವರ್ನ್ ಹೆರಿಕರ್ನಾ ಪಾತ್ರ್ ಕರಯ್ಲೊ.

‘ಮಹಾನದಿ’ ರಿಲೀಜ್ ಜಾಲ್ಯಾ ನಂತರ್ ಹೆರಿನ್ ಪಾಟಿಂ ಪಳೆಲೆಂನಾ. ರೋಶನ್ ಬೆಳ್ಮಾಣ್ ನಿರ್ಮಾಣಾಚಾ ಡೊಲ್ವಿನ್ ಕೊಳಾಲ್-ಗಿರಿ ಸಂಗೀತ್ ನಿರ್ದೇಶನಾಖಾಲ್ “ತುಂಚ್ ತುಂ…”, ಅಮೆರಿಕಾಚಿ ‘ಗ್ರ್ಯಾಮಿ ಅವಾರ್ಡ್’ ಜೊಡ್ಪಿ ಖ್ಯಾತ್ ಸಂಗೀತ್ಗಾರ್ ವನಿಲ್ ವೇಗಸ್ ಉಳ್ಳಾಲ್ ಹಾಚೊ ವೀಡಿಯೊ ಆಲ್ಬಮ್ “ನಾಚ್ ಆಮಿಂ ನಾಚುಂಯಾಂ” ವಿಲ್ಸನ್ ಕಟೀಲಾಚಾ ಪದಾಂಕ್, ಹೆರಿ ಸಂಗಿಂ ತಾಚಿ ಪತಿಣ್ ಶ್ರೀಮತಿ ಕೆರನ್ ಸುನಿತಾ ಕೊರೆಯಾ ಹಿಣೆಂಯೀ ಮದುರ್ ತಾಳೊ ದಿಲಾ.

“ಕೊಂಕ್ಣೆಂತ್ಲೆಂ ಪಯಿಲ್ಲೆಂ ಬಿಗ್ ಬಜೆಟ್ ಫಿಲ್ಮ್ ‘ಅಸ್ಮಿತಾಯ್’ಕ್ ತುಂ ಕಸೊ ವಿಂಚುನ್ ಆಯ್ಲೊಯ್ – ತೆಂ ತುಂವೆಂ ಸಾಂಗುಂಕ್ ನಾಂಯ್?” ಹಾಂವೆಂ ಶಿಣ್ ಉಚಾರ್ತಾನಾ ಹೆರಿ ಚುರ್ಚುರೊನ್ ಮ್ಹಣಾಲೊ: “ದೆರೆಬೈಲ್ ಇಗರ್ಜೆ ವಾಡ್ಯಾಂತ್ ವಸ್ತಿ ಕರ್ಚೊ ಪ್ರಖ್ಯಾತ್ ಕಾರ್ಯ-ನಿರ್ವಾಹಕ್ ‘ಕಲಾ ಸಂಪತ್’ ಕಾರ್ಬಾರಿ, ಮಾನೆಸ್ತ್ ಆರ್ಥರ್ ಡಿಸೋಜಾನ್ ಮಾಕಾ ಖಬಾರ್ ದಿಲಿ ಆನಿ ವಚಾಜೆಚ್ ಮ್ಹಣ್ ವತ್ತಾಯೆನ್ ಫರ್ಮಾಯ್ಲೆಂ. ತಾಚಾ ಉತ್ರಾಂಕ್ ಖಾಲ್ತಿಮಾನ್ ಗಾಲ್ನ್ ಆಡಿಷನ್ ದಿಲೆಂ. ಮ್ಹಜೊ ಧಡಂಗ್ ಜೀವ್ ಪಳೆವ್ನ್ ಮಾಕಾ ವಿಲನ್ ಪಾತ್ರ್ ದಿಲೊ ಆನಿ ಹಾಂವೆಂ ತಾಂಕಿ ವರ್ತ್ಯಾ ಮಿನತೆನ್ ಕಾಮ್ ಕರ್ನ್ ಮ್ಹಜಿ ‘ಅಸ್ಮಿತಾಯ್’ (Identity) ದಾಕಯ್ಲಿ. ಮುಂದರುನ್ ಮಾಂಡೊ ಖೊರ್ಪುನ್ ಹೆರಿ ಉದ್ಗಾರ್ಲೊ – “Sorry ಆನ್ಯೇಕ್ ಸಾಂಗೊಂಕ್ ವಿಸರ್ಲೊಂ. ಮೆಲ್ವಿನ್ ಎಲ್ಪೆಲ್ ನಿರ್ದೇಶನಾಖಾಲ್ ಸುನಿಲ್ ಬಾರೆಟ್ಟೊ ಹಾಣೆಂ ನಿರ್ಮಾಣ್ ಕೆಲ್ಲೆಂ ಕೊಂಕ್ಣಿ ಫಿಲ್ಮ್ “ವೊಡ್ತಾಂತ್ಲೆಂ ಫುಲ್” ಹಾಂತುಂಯೀ ಹಾಂವೆಂ ಪಾತ್ರ್ ವಹ್ಸಿಲಾ.”

ಲೂರ್ಡ್ಶ್ ಸೆಂಟ್ರಲ್ ಸ್ಕೂಲ್ ಇಜಯ್ ಹಾಂಗಾಸರ್ ಶಿಕೊನ್ ಆಸ್ಚಿಂ ದೊಗಾಂ ಮಾಣ್ಕುಲಿಂ ಹ್ಯೂ ಕೆನ್ನಿ ಕೊರೆಯಾ ಆನಿ ಹೆದರ್ ಕೆಲ್ಲಿ ಕೊರೆಯಾ – ಹಿಂ ಸುನಿತಾ-ಹೆರಿಚೆಂ ಬುರ್ಗಿಂ.

ತಾಲೆಂತಾಚೆಂ ಭಂಡಾರ್ ಕೊರೆಯಾ ಕುಟ್ಮಾಕ್ – ವಿಗಾರ್ ಬಾಪ್, ಕಾಜಿತೊರಾ ಸಂಗಿಂ ಸಗ್ಳಿ ದೆರೆಬೈಲ್ಚಿ ದೇವ್ ಪ್ರಜಾ ಸರ್ವ್ ಬರೆಂ ಮಾಗ್ತಾ.

- ರಿಚ್ಚಿ ಪಿರೇರ್, ದೆರೆಬೈಲ್