ಸಾಹಿತಿಚೆ ಸಂಕಷ್ಟ್ by ರಿಚ್ಚಿ ಪಿರೇರ್ Back

ಸಾಹಿತಿಚೆ ಸಂಕಷ್ಟ್

ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ವಾಚುನ್, ಹಾಸೊನ್ ನಾಚ್ತಾ ಗಾಂವ್

ವಾಚ್ತೆಲ್ಯಾಕ್ ನಾಚ್ತೆಲ್ಯಾಕ್ ಕಿತೆಂ ಕಳಿತ್
ಸಿಂತಿಮೆಂತಾಂ ದುಃಖಾಂನಿ ಖಿರವ್ನ್
ಕೊಡು ಕಾಲ್ಸ್ ನಿರಾಳ್ ಪೊಟಾರ್ ಪಿಯೆವ್ನ್...
ಮಾರ್ಲೆಲಿ ಉತ್ರಾಂ, ತೊಪ್ಲೆಲೆ ಭಾಲೆ
ಝೆಲೆ ಕರ್ನ್ ಗಳ್ಯಾಕ್ ಘಾಲೆ

ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ವಾಚುನ್, ಹಾಸೊನ್ ನಾಚ್ತಾ ಗಾಂವ್

ಉಬ್ಗೊಣ್ ಧಾಂವ್ಡಾಯ್ತೆಲ್ಯಾಕ್, ಉಲ್ಲಾಸ್ ಭೊಗ್ತೆಲ್ಯಾಕ್
ಸಾಹಿತಿಚೆಂ ಸುಕ್-ದುಕ್ ಕಳಾತ್ ಕಿತೆಂ?
ಸುತಾಕ್ ಬಾಂದ್ಲೆಲ್ಯಾ ತಲ್ವಾರಿ ಸಕಯ್ಲ್ ಮಾತೆಂ
ಮೊಡ್ಕೊರ್ ಖಾಂದ್ಯಾರ್ ಉಮ್ಕೊಳೆಂ
ಕೆದ್ನಾಂಯೀ ರಿತೆಂ ಪೊತೆಂ

ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ವಾಚುನ್, ಹಾಸೊನ್ ನಾಚ್ತಾ ಗಾಂವ್

ವಾಚ್ತೆಲ್ಯಾಚ್ಯೊ, ಪ್ರಕಟ್ತೆಲ್ಯಾಚ್ಯೊ 'ತ್ಯೊಚ್ ಜಾತಿ'
ಮೊರ್ಚೆ ಆದಿಂಚ್ ನಿಕೆಪಿಲ್ಲ್ಯೊ ರುಜ್ವಾತಿ
ಕೊಂಪ್ರಾಕ್ ಮೊಂವ್ ಲಾಯಿಲ್ಲೆ ಲಾಕ್ಪತಿ
ಜೀವ್ ವಾಂಚಂವ್ಕ್ ಜೆವಾಣ್ ನಾ - ಬೊಶಿ
ಬೂದ್-ಬಾಳ್, ಭುಜಾವಣ್ ದಿಲಿ ದಾದೊಶಿ

ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ವಾಚುನ್, ಹಾಸೊನ್ ನಾಚ್ತಾ ಗಾಂವ್

ಆಮ್ಚೆಂ 'ಉತ್ಪಾದನ್' ವಿಕ್ತೆಲ್ಯಾಕ್ ಕಾಂಯ್ ಭೊಗ್ಲಾಂ?
ನೀಸ್-ಪೇಜ್ ನಾಸ್ತಾಂ ಜಿವಾನ್ ಭಾಗ್ಲಾಂ
ಕಥಾ-ಕವಿತಾಂ ಕಾಟ್ ಕರ್ನ್ ಗುಜರಿಕ್ ವಿಕ್ಲಾಂ
ವಿಣ್ಗ್ಯಾ ಪಾಂಯಾಂಚಿಂ ಪಾವ್ಲಾಂ - ಉಮ್ಕಾಳ್ತಾತ್ ಕಾತಿ
ತರ್ನ್ಯಾ ತೊಂಡಾರೀ ಪಿಕ್ಯಾ ಖಾಡಾಚಿ ಕುತಿ

ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ಮ್ಹಾಕಾ 'ಮಸ್ತುನ್' ನಾಚ್ತಾ ಗಾಂವ್

- ರಿಚ್ಚಿ ಪಿರೇರ್, ದೆರೆಬಯ್ಲ್