ಲ್ಹಾರಾಂ ಪಾಟ್ಲಿ ತಾನ್ - by ಫೆಲ್ಸಿ ಲೋಬೊ Back

ಲ್ಹಾರಾಂ ಪಾಟ್ಲಿ ತಾನ್

ಮೊನೆಂ ರುದಾನ್ ಸಂಸಾರ್ ಭರ್
ನವೆಸಾಂವಾಚ್ಯಾ ಗಜಾಲಿಂಕ್
ಆರಾವ್ನ್ ಚಲಾತ್ತ್ ವೆತಾ
ಮಹಿನೆ ವರ್ಸಾಂಕ್ ತಾಂಡುನ್
ಥಾಂಬ್ಚಿ ದಿಸಾನಾ ತಾನ್

ಲ್ಹಾರಾಂಚೆಂ ರೂಪ್ ಘೆವ್ನ್
ಎಕಾಚ್ಛಾಣೆಂ ದಾವ್ಲಿ ಮಾರಿತ್
ವೊಡುನ್ ವ್ಹರಿತ್ ಆಸಾಯ್
ಲ್ಹಾನ್ ವ್ಹಡ್ ದುಬ್ಳೊ ಗಿರೆಸ್ತ್
ಮ್ಹಳ್ಳೊ ಭೇದ್ ವಿಸ್ರೊನ್

ಪಯ್ಲ್ಯಾ ಲ್ಹಾರಾಂತ್ ಮಾಲ್ಘಡಿಂ
ದುಸ್ರ್ಯಾಂತ್ ತರ್ನಿಂ
ತಿಸ್ರ್ಯಾಂತ್ ಬಾಳಾಂ ಮ್ಹಣೊನ್
ನಿಂವೊನ್ ವಚಾನಾತ್ಲಿ ತಾನ್
ಭಂವ್ತಿ ಭಿರಾಂತೆಚಿ ಕಾಳ್ಬಾಣ್

ತುಜ್ಯಾ ತಾನೆಕ್ ಭಾಗಂವ್ಕ್
ಆಸ್ ಲ್ಲ್ಯಾನ್ ದುಡು ವೊತ್ಲೊ
ನಾತ್ ಲ್ಲ್ಯಾನ್ ಶ್ವಾಸ್ ಒಪ್ಸಿಲೊ
ಮೆಂದು ಪಾಜುನ್ ಶಾಣ್ಯಾನ್
ಬಾಚಾವೆ ಹಿಶಾರೊ ದಿಲೊ

ಉಮಾಳೊನ್ ಎಂವ್ಚ್ಯಾ ಲ್ಹಾರಾಂ
ಫುಡೆಂ ಹರ್ದೆಂ ಫುಲಂವ್ಚೊ
ಮನಿಸ್ ಲಿಪ್ಲಾ
ಧನ್ ದಿರ್ವೆಂ ಸಂಪತ್ತಿ ಸಗ್ಳಿ
ವ್ಯರ್ಥ್ ಮ್ಹಣ್ ಗಮೊಂಕ್ ಲಾಗ್ಲಾಂ

ಆಯ್ದಾಂವಿಣ್ ಝುಜ್ ಹೆಂ
ಕಿತ್ಲ್ಯಾಲ್ಹಾರಾಂನಿ ಸಂಪಾತ್?
ಕ್ಷಣಿಕ್ ಸುಖಾ ಪಾಟ್ಲ್ಯಾನ್ ಧಾಂವ್ಚ್ಯಾ
ಮನ್ಶ್ಯಾ ಕೆನ್ನಾಂ ಮತ್ ಉಜ್ವಾಡಾತ್?
ಏ ಮರ್ಣಾ ಕಶಿ ತುಜಿ ತಾನ್ ಭಾಗಾತ್?

ಫೆಲ್ಸಿ ಲೋಬೊ