ಯಾದಿಂಚ್ಯೊ ವೊಳಿ by ಫೆಲ್ಸಿ ಲೋಬೊ Back

ಯಾದಿಂಚ್ಯೊ ವೊಳಿ

ರಾಂದ್ಣಿಂತ್ಲ್ಯಾ ಗೊಬ್ರಾಕ್
ತಿಚ್ಯಾ ಬೊಟಾಂನಿ ಪೊಶೆತಾನಾ
ಸುಕ್ಯಾ ಲಾಂಕ್ಡಾಂನಿ ಜೀವ್ 
ಚರ್ತಾಲೊ ಕುಡಾಂತ್
ಉಭೆಚೆಂ ರಾಜ್ ಸುರ್ವಾತ್ತಾಲೆಂ

ಘರ್ಚ್ಯಾ ಆನಿ ಗೊಟ್ಯಾಂತ್ಲ್ಯಾ
ಜಿವಾಂಚಿಂ ಪೊಟಾಂ
ಚದಾಂಚ್ ಭರೊನ್ ಉರ್ಚ್ಯಾಕ್
ವಿಶೆವ್ ಆಶೆನಾತ್ಲೆಲ್ಯಾ ತಿಚ್ಯಾ
ವಾವ್ರಾಕ್.ಸಾಂಭಾಳ್ ನಾತ್ ಲ್ಲೊ 

ಪಾವ್ಶಿಲ್ಯಾ ದಿಸಾಂಚಿ ಗಿಮಾಂತ್ ಚ್
ಖಂತ್ ಕಾಡ್ಚ್ಯಾ ತಿಚ್ಯಾ
ಭೊರ್ಣೆಂನಿ ಬುಯಾಂವಾಂನಿ
ವೊರ್ವಿ ಆನಿ ಖಾಣಾಂಕ್
ಬರ್ಗಾಲ್ ಏನಾತ್ ಲ್ಲೊ

ಜುನೆರಾ ಪೊಂತ್ ಪೆಂಕ್ಡಾ ಖೊವವ್ನ್
ಕಸ್ರೆ ಬೆಲಾ ಗಾದ್ಯಾ ಮೆರಾಂನಿ
ಸದಾಂ ಚಮ್ಕೊಂಚ್ಯಾ 
ಮೊವ್ ಮೆಟಾಂಚ್ಯಾ ಸ್ಪ್ರರ್ಶಾಕ್
ಕಾಟ್ ತಣ್ ಯಿ ಗೌರವಾನ್
ಮಾನ್ ಬಾಗಾಯ್ತಾಲೆಂ.

ಧುವಾ ಸುನಾಂಚ್ಯಾ ಬಾಂಳ್ತೆರಾಂತ್
ಗಾಬೆಚ್ಯಾ ಗಾಯ್ ಮೊಶಿಂಚ್ಯಾ
ಧುಕಿ ಸುಸ್ಕಾಂರಾನಿಂ
ಪಾನೊ ದಿಂವ್ಚ್ಯಾ ಸುಣ್ಯಾ
ಮಾಜ್ರಾಂಚ್ಯಾ ಹುಸ್ಕ್ಯಾಂನಿ
ತಿಚೆಂ ನಿಯಮ್ ತಾಳ್ ಪಡ್ತಾಲೆಂ

ಫೆಸ್ತಾಂ ಪರ್ಬೊ ಸಯ್ರಿಂ ದಯ್ರಿಂ
ಸೆಜ್ರಾ ವಾಡ್ಯಾಂತ್
ಸುಖ್ ದುಖಾಚ್ಯಾ ಗಜಾಲಿಂ ಮಧೆಂಯ್
ತಿಚೆಂ ಕಾಶೆಲೆಂಪಣ್
ಅಂಕ್ರೆವ್ನ್ ನವ್ಸರ್ತಾಲೆಂ.

ಆಜ್ ದೊನ್ಪಾರಾಂ
ಪೆದೊ ಸೊದ್ಚ್ಯಾರ್ ಪಡ್ಲಾ 
ತಿಚೊ ಪತ್ತೊ
ಆಮೆರಿಕಾ ಆನಿ ಕೆನಡಾ ಥಾವ್ನ್
ಆಯ್ಲೆಲಿಂ ಕಾರ್ಡಾಂ ಗೆವ್ನ್
ಆವಯ್ಚ್ಯಾ ದಿಸಾಚೆ
ಶುಭಾಶಯ್ ಪಾವಂವ್ಕ್
ಬಾವ್ಡ್ಯಾಕ್  ತಿ ಆಸ್ಚ್ಯಾ ಆಸ್ರ್ಯಾಚಿ
ನಾ ಖಬರ್

ಫೆಲ್ಸಿ ಲೋಬೊ