ಯಾದಿಂಚ್ಯಾ ಅಂಗ್ಣಾಂತ್ಲೊ ಗಾಂಧಿ! Back

ಯಾದಿಂಚ್ಯಾ ಅಂಗ್ಣಾಂತ್ಲೊ ಗಾಂಧಿ!

ಅಸೊಚ್ ಕೆನ್ನಾಂ ಪಾಸಾಯೊ
ಮಾರಿತ್  ಯೇವ್ನ್ ವೆತಾ
ತೊಚ್ ಶಿರ್ಪುಟೊ,  ಹಾತಿಂ
ತೆಂಕುಂಕ್ ದಾಂಡೊ ಘೆತ್ಲಲೊ
ಗಾಂಧಿ.....
ಯಾದಿಂ ಆಂಗ್ಣಾಂತ್ ಮ್ಹಜ್ಯಾ
ಗಾಂವಾರ್ ಝುಜಾ ಚುಡಿ ಖೆಳ್ತಾನಾ....

ಮುಖಮಳಾರ್  ದುಖಿಚಿ ಸಾಯ್
ಘೆವ್ನ್,  ಸವ್ಕಾಸ್ ಚಮ್ಕುನ್ ಯೆತಾ
ತೊಚ್ ತೊ  ಗಾಂಧಿ...
ದೇಶಾಂತ್ ಮ್ಹಜ್ಯಾ ಅಸ್ತುರೆಚೆ
ಕುಡಿ ಭಗ್ಣಾಂ ಅಸ್ಥಿತ್ವಾಕ್ ಚ್
ಮಾರ್ ಬಸ್ತಾನಾ....

ಲಿಪ್ ಲ್ಲ್ಯಾ ಝರ್ ಲ್ಲ್ಯಾ ಗಾದ್ಯಾ
ಮೆರಾಂಕ್ ಸೊಧುನ್ ಕೆನ್ನಾಂ ಕೆನ್ನಾಂ
ಬೇತ್ ತೆಂಕುನ್  ಹಳೂ
ಭೆಟ್ ದಿತಾ ಮ್ಹಜೊ ಗಾಂಧಿ
ಆಪ್ಲ್ಯಾ ರೈತ್ ಭಂದ್ವಾಂ, ವಾವ್ರಾಡಿ
ಕಾಮೆಲ್ಯಾಂ ಖಾತಿರ್ ಕೆಲ್ಲ್ಯಾ
ಆಂದೋಲನಾಂಚೆ  ನಾರೆ ಘೆವ್ನ್....

ಚಿಕಾರ್ ಭರ್ಲೆಲ್ಯಾ ಶೆರಾಂ
ಸಾಂತೆನಿಂಯ್ ಅಜ್ಯಾಪಿಂ
ದೀಶ್ಟ್ ಘುಂವ್ಡಾವ್ನ್
ದಿಷ್ಟಿಕ್ ಪಡೊನ್ ಮಾಯಾಗ್
ಜಾತಾ ಹೊ ಗಾಂಧಿ,
ಏಕತೆಚೆಂ ಮಂತ್ರ್ ಆವಾಜಾವಿಣ್
ಜಾಲ್ಲೆಂ ದೆಖೊನ್....

ಆವಯ್ ಪೆಂಕ್ಡಾರ್ ಚಡೊನ್
ಬಸೊನ್,  ಮಧುರ್ ಹಾಸ್ಯಾಂನಿ
ಪಿಶ್ಯಾರ್ ಘಾಲ್ಚ್ಯಾ ಮಾಸೂಮ್
ಬಾಳಾಂಕ್ ಸೊಧುನ್ ಯೆತಾ
ಅಪ್ರೂಪ್ ಮ್ಹಜೊ ಗಾಂಧಿ...
ವೋಂಟ್ ರುಂದಾವ್ನ್
ಹಾಸೊನ್ ಚಲ್ತಾ.....
ಸ್ವತಂತ್ರ್ ದೇಶಾಂತ್ ಮ್ಹಜ್ಯಾ
ಭದ್ರತೆಚಿಂ ಸೊಪ್ಣಾಂ ಫುಲವ್ನ್....

  ಫೆಲ್ಸಿ ಲೋಬೊ