ಮ್ಹಜೆಂ ಬಾಳ್ ಕವಿತಾ ಬರಯ್ತಾ by ಪ್ರೀತನ್ ಪಿರೇರಾ Back

ಮ್ಹಜೆಂ ಬಾಳ್ ಕವಿತಾ ಬರಯ್ತಾ

ಬಾಳ್ ಮ್ಹಜೆಂ ಜಾಣ್ತೆಂ ಜಾಲಾಂ, ಮ್ಹಣುನ್ ಮ್ಹಾಕಾ ಭೊಗ್ತಾ,
ಬರೊಂವ್ಚೊ ಹುಸ್ಕೊ ತಾಕಾ, ದೀಸ್-ರಾತ್ ಧೊಸ್ತಾ.
ಬಾಳಾಕ್ ಪಳೆಲ್ಲ್ಯಾ ಫರಾ, ಲಿಖ್ಣಿ ಮ್ಹಜಿ ಕಾಂಪ್ತಾ,
ಬುಕಾಂ-ಪಾನಾಂಚ್ಯಾ ಕುಡಿಂತ್, ಶಿರ್ಶಿರೊಚ್ ಧಾಂವ್ತಾ...

ಕಿತ್ಯಾಕ್, ಆತಾಂ ಬಾಳ್ ಮ್ಹಜೆಂ ಕವಿತಾ ಬರಯ್ತಾ!

ವೊಣ್ತಿ-ಕುಂದ್ಯಾರ್ ಬರಯ್ತಾನಾ, ಡಾಡಾ ರಾಗಾರ್ ಜಾತಾ,
ಹಾತಾ-ಪಾಯಾರ್ ಬರಯ್ಲ್ಯಾರ್-ಮಮ್ಮಾ ಬೊಬಾಟ್ ಮಾರ್ತಾ.
ಬರೊಂವ್ಚ್ಯಾ ಆಪ್ಲ್ಯಾ ಹುಮೆದಿಕ್, ಬಾಂಧುನ್ ಘಾಲುಂಕ್ ಜಾತಾ?
ನಿಮಾಣೆಂ, ಬಾವ್ಡೆಂ ರಾಗ್ ಸಗ್ಳೊ ಬುಕಾಂಚೆರ್‍ಚ್ ಕಾಡ್ತಾ...

ಆನಿಂ ಖಳ್ಮಿತ್ ನಾಸ್ತಾಂ ಬಾಳ್ ಮ್ಹಜೆಂ ಕವಿತಾ ಬರಯ್ತಾ!

ಬಾಳಾಕ್ ಮ್ಹಜೆರ್ ಹುಸ್ಕೊ ಕಿತ್ಲೊ, ಕುಮೊಕ್ ಮ್ಹಾಕಾ ಕರ್ತಾ,
ರಾಂದ್ಪಾ ಕುಡಾಂತ್ಲ್ಯಾ ಆಯ್ದಾನಾಂಚಿ ರಂಗೋಲಿಚ್ ಘಡ್ತಾ.
ಕೊಪಾಂ, ಗೊಬ್ಳೆ, ಕುಲೆರಾಂ ಘೆವ್ನ್ ರಾಂದಾಪ್ ತಯಾರ್ ಕರ್ತಾ,
ಸಬ್ದಾಂ-ಗೊಂದೊಳ್-ಸಂಗೀತಾಂತ್, ಆಯ್ದಾನಾಂ ವೊಮ್ತಿಂ ಗಾಲ್ತಾ...

ಖುದ್ದ್ ತಾಚ್ಯಾ ಮುಖಮಳಾರ್ ಕವಿತಾ ವಾಚುಂಕ್ ಜಾತಾ!

ಘರ್ಚ್ಯಾ ಕಾಮಾಂತ್ ಬಾಳ್ ಮ್ಹಜೆಂ, ಭಾರಿ ಉರ್ಬಾ ದಾಕಯ್ತಾ,
ವ್ಹಡ್ಲಿ ಜಯ್ತ್ ಸಾರೊಣ್ ಘೆವ್ನ್, ನಾತ್‍ಲ್ಲೊ ಕೋಯ್ರ್ ಝಾಡ್ತಾ.
ಉಂಬೊಳ್ನ್ ದವರ್ ಲ್ಲೊ  ತುವಾಲೊ ಘೆವ್ನ್, ಮ್ಹೆಳಿ ಧರ್ಣ್ ಪುಸ್ತಾ,
ಘಡಿ ಕೆಲ್ಲಿಂ ವಸ್ತುರಾಂ ಪೂರಾ, ಪರ್ತ್ಯಾನ್ ಸುಖಾತ್ ಘಾಲ್ತಾ...

ಇತ್ಲ್ಯಾರ್ ಖರಿಚ್ ಕವಿತಾ ತಾಚಿ, ವರ್ತಿ ಖರಸ್ ಕಾಡ್ತಾ!

ಹಾತಿಂ ತಿಂತೆರ್ ಘೆವ್ನ್, ವ್ಹಡ್ಲಿ ಕವಯತ್ರಿ- ಪೋಝ್  ದಿತಾ,
ಎಕೆಕ್  ಪಾವ್ಟಿಂ ಗಂಭೀರ್ ಜಾವ್ನ್, ಸಬ್ದಾಂ-ಸೊಧ್ನಾಂ ಕರ್ತಾ.
ದುಸ್ರೆಚ್ ಘಡಿಯೆ ನಿದೆಂತ್ ಪಿಕೊನ್, ಸಪ್ಣಾಂ ಸಜಯ್ತಾ,
ಬಾಳಾಚಿ ಕವಿತಾ ಅರ್ಥ್ ಕರುಂಕ್, ಖರೆಂಚ್ ಕಷ್ಟ್ ಮಾರ್ತಾ...

ಆಬ್ಳೆ! ತಾಕಾ ಪಳೆವ್ನ್-ಪಳೆವ್ನ್ ಮ್ಹಜಿಯೀ ಉರ್ಬಾ ವಾಡ್ತಾ!

ಪ್ರೀತನ್ ಪಿರೇರಾ 

ಲ್ಯಾಂಡ್‍ಲಿಂಕ್ಸ್ ಅಪ್ಪರ್ ವಾಡೊ