ನಾಕಾ ತಾಂಚೆ ಬರಿ ಜಾಂವ್ಚೆಂ

ಹಾಂವ್ ಇಲ್ಲಿಂ ಕಾಳಿಂ, ಗೊರಿಂ ಆಸ್ಲ್ಯಾರ್ ಕಿತ್ಲೆಂ ಬರೆಂ ಆಸ್ತೆಂ

ಇಸ್ಕೊಲಾಂತ್ ಆಸಾ ಏಕ್ ಚೆಡುಂ ಕಿತ್ಲೆಂ ಗೊರೆಂ

ತಾಚೆ ಬರಿ ಹಾಂವ್ ಗೊರಿಂ ಗೊರಿಂ ಆಸ್ಲ್ಯಾರ್ ಕಿತ್ಲೆಂ ಬರೆಂ

ಪುಣ್ ತೆಂ ಏಕ್ ಚೂಡ್ ಕೊತ್ರು, ನಾಕಾ ದೆವಾ ತಾಚೆ ಬರಿಂ ಜಾಂವ್ಚೆಂ.

ಹಾಂವ್ ಶಿಕ್ಚ್ಯಾಂತ್ ಇಲ್ಲಿಂ ಪಾಟಿಂ, ಹುಶಾರ್ ಆಸ್ಲಿಂ ತರ್ ಕಿತ್ಲೆಂ ಬರೆಂ ಆಸ್ತೆಂ

ಮ್ಹಜ್ಯಾ ಕ್ಲಾಸಿಂತ್ ಆಸಾ ಎಕ್ಲೆಂ ಚೆಡುಂ ಶಿಕ್ಪಾಂತ್ ಕೆದಾಳಾಯ್ ಪಯ್ಲೆಂ

ತಿತ್ಲಿ ಬುದ್ವಂತ್ಕಾಯ್ ದೆವಾನ್ ಮಾಕಾ ದಿಲ್ಲಿ ತರ್,

ಪುಣ್ ತೆಂ ಚೆಡುಂ ಹಂಕಾರಿ, ನಾಕಾ ದೆವಾ ತಾಚೆ ಬರಿ ಜಾಂವ್ಚೆಂ.

ಮ್ಹಜೆಂ ಕುಟಾಮ್ ದುಬ್ಳೆಂ, ಡಾಡಾಚೊ ಸಾಂಬಾಳ್ ಖರ್ಚಾಕ್ ಪಾವಾನಾ

ಆಮ್ಚ್ಯಾ ಸೆಜಾರಾ ಸದಾಂನಿತ್ ಮಾಸಾಂ, ಫೆಸ್ತಾ, ಬರಿ ಮುಸ್ತಾಯ್ಕಿ

ತಾಂಚೆ ಬರಿ ಏಕ್ ಗ್ರೇಸ್ತ್ ಕುಟಾಮ್ ಮಾಕಾ ಆಸ್-ಲ್ಲೆಂ ತರ್,

ಹಾಬ್ಬಾ ನಾಕಾ ದೆವಾ! ತಾಂಚ್ಯಾ ಘರಾ ಸದಾಂನಿತ್ ಝಗ್ಡೆಂ ಆನಿ ಲಡಾಯ್.

ದೆವಾ ಆನಿ ಮುಕಾರ್ ಹಾಂವ್ ಮಾಕಾ ಹೆರಾಂಕ್ ತುಲನ್ ಕರಿನಾ

ಮಾಕಾ ಕಿತೆಂ ತುವೆಂ ದಿಲಾಂಯ್, ತೆಂ ತುಜೆಂ ದೆಣೆಂ ಮ್ಹಣ್ ಹಾಂವ್ ಲೆಕ್ತಾಂ

ಮಾಂದ್ರಿ ಆಸಾ ತಿತ್ಲಿ ಪಾಯ್ ಸೊಡುಂಕ್ ಬರೆಂ ಮನ್ ದಿ

ಬರೆಂ, ಮೊಗಾಳ್ ಆನಿ ಶೆಗುಣಿ ಭುರ್ಗೆಂ ಜಾವ್ನ್ ಜಿಯೆಂವ್ಕ್ ಕುರ್ಪಾ ದಿ.

-ಶೈನಲ್ ಜೆನಿಶಾ ಪಿಂಟೊ

ಮುಲ್ಲಕಾಡ್ ವಾಡೊ

(ಜೂನ್ 30ವೆರ್ ಚಲ್-ಲ್ಲ್ಯಾ ಕವಿಗೋಷ್ಠಿಂತ್ ಲೊಕಾಂನಿ ವಿಂಚುನ್ ಕಾಡ್ಲೆಲಿ ಆನಿ ಇನಾಮ್ ಆಪ್ಣಾಯಿಲ್ಲಿ ಕವಿತಾ)