ಗಾಂಧಿ ಮಾಮಾ ಭೊಗ್ಶಿ ಮ್ಹಾಕಾ! by ಪ್ರೀತನ್ ಪಿರೇರಾ Back
ಗಾಂಧಿ ಮಾಮಾ ಭೊಗ್ಶಿ ಮ್ಹಾಕಾ!
ನಾಕಾ ಗಾಂಧಿ ಮಾಮಾ ನಾಕಾ
ತುವೆಂ ಹಾಂಗಾ ಯೆಂವ್ಚೆಂ ನಾಕಾ!
ದುಬ್ಳಿಕಾಯ್ ಹಾಂಗಾಸರ್ ಭರೊನ್ ವೊಮ್ತಾತಾ
ಬೆಬ್ದೆಪಣ್ – ಬೆಕಾರ್ಪಣ್, ಭುಕೆಸಂಗಿಂ ರಾಜ್ ಕರ್ತಾ
ವಯ್ಲ್ಯಾನ್ ರಾಜಕೀಯಾಚೊ ಭುರ್ಸೊ ಖೆಳ್ ಚಲ್ತಾ…
ಕರ್ಪಾತೆಲಿಂ ಮುಖೆಲ್ಯಾಂಚಿಂ ಮುಖಾಂ
ತುವೆಂ ಹಾಂಗಾ ಯೆಂವ್ಚೆಂ ನಾಕಾ!
ಚೋರ್-ಲುಟ್ಕಾರ್ ಹಾಂಗಾಸರ್ ರಾಸ್ ಪಡ್ಲ್ಯಾತ್
ಸಲೀಸಾಯೆನ್ ಸರ್ವಾಂಕೀ ಲುಟೊನ್ ಆಸಾತ್
ತುಂ ಯೆಶಿ ಜಾಲ್ಯಾರ್ ತುಕಾಯೀ ಸೊಡ್ಚೆನಾಂತ್…
ದೆಂವ್ತೆಲಿಂ ತುಜ್ಯಾ ದೊಳ್ಯಾಂನಿ ದುಕಾಂ
ತುವೆಂ ಹಾಂಗಾ ಯೆಂವ್ಚೆಂ ನಾಕಾ!
ದುಡ್ವಾಚೊ ದಂದೊ ಚಲ್ತಾ ಹ್ಯಾ ದೇಶಾಂತ್
ಬೊಕ್ರ್ಯಾ ರುಪಾಚೆ ಬೊಲ್ಪೆ - ದಾಳ್ ಶಿಜಯ್ತಾತ್
ದೆಶಾಕ್ ಆಡೊವ್ ಘಾಲುಂಕೀ ಪಾಟಿಂ ಸರ್ಚೆನಾಂತ್...
ಪರಿಸ್ಥಿತಿ ಪಳೆವ್ನ್ ಭೊಗ್ತಾ ಮ್ಹಾಕಾ
ತುವೆಂ ಹಾಂಗಾ ಯೆಂವ್ಚೆಂ ನಾಕಾ!
ತುಜೆಂ ಅಹಿಂಸಾ ತತ್ವ್ ನಿರ್ಫಳ್ ಕೆಲಾಂ
ಮನಿಸ್ ಮೊನ್ಜಾತಿಪರಿಂ ಮಾರ್ಗಾರ್ ಮೆಲಾ
ಲೊಂಚಾ ಶಿವಾಯ್ ಬೊಂಚೊ ಹಾಲಾನಾ ಜಾಲಾ...
ದೆಕುನ್ ಚತ್ರಾಯ್ ಸಾಂಗ್ತಾ ತುಕಾ
ತುವೆಂ ಹಾಂಗಾ ಯೆಂವ್ಚೆಂ ನಾಕಾ!
ಹಾಂಗಾ ಕೊಣಾಕ್ ಕೋಣ್ ನಾ ಜಾಲಾ
ಕಾರ್ಯೆಂ ಜಾಲಾಂ, ವಯ್ಜ್ ಮೆಲಾ
ದೆಕುನ್ ದಾಕ್ಷೆನಾಸ್ತಾಂ ಸಾಂಗಾಜೆ ಜಾಲಾಂ...
ದೇಶ್-ಪ್ರೇಮಿ ಗೆಲ್ಯಾತ್ ಸರ್ಗಾ-ಸುಖಾ
ತುವೆಂ ಹಾಂಗಾ ಯೆಂವ್ಚೆಂ ನಾಕಾ!
ಸಮಸ್ಸೆ ಸಾಂಗೊನ್ ಆಕೇರ್ ಜಾಂವ್ಚೆನಾಂತ್
ಪರ್ನೆ ಮೊರ್ತಾನಾ, ತುರಂತ್ ನವೆ ಜಲ್ಮಾತಾತ್
ಗಲ್ಲ್ಯಾಂನಿ 'ಗಲೀಜ್' ಪಳೆವ್ನ್ ತುಜೆಂ 'ಕಾಳಿಜ್' ಬಸಾತ್...
ಹಾಂಗಾಸರ್ ತುವೆಂ ಯೆಂವ್ಚೆಂಚ್ ನಾಕಾ
ಪರ್ಗಾವಾಂತ್ಲೆಂ ಅಭಿಮಾನಿ ರಾಕ್ತಾತ್ ತುಕಾ!
ಪ್ರೀತನ್ ಪಿರೇರಾ
ಲ್ಯಾಂಡ್ ಲಿಂಕ್ಸ್ ಅಪ್ಪರ್ ವಾಡೊ
