ಕೊಂಕ್ಣಿ ಮಾನ್ಯತಾ ದಿಸಾ...... by ಜ್ಯೂಲಿಯೆಟ್ ಫೆರ್ನಾಂಡಿಸ್ (ಮೊರಾಸ್) Back

ಕೊಂಕ್ಣಿ ಮಾನ್ಯತಾ ದಿಸಾ...... 

ಆಗೋಸ್ತ್ ಮಹಿನ್ಯಾಚಿ ತಾರಿಕ್ ವೀಸ್, 
ಕೊಂಕ್ಣಿ ಲೊಕಾಕ್ ಸಂಭ್ರಮಾ ದೀಸ್, 
ಕಾಳ್ಜಾಂ ಉಲ್ಲಾಸಾನ್ ಫುಲ್ತಾತ್
ದೊಳ್ಯಾಂನಿ ಸಂತೊಸಾನ್ ಪೊವ್ಳಾಂ ದೆಂವ್ತಾತ್. 

ಕೊಂಕ್ಣಿ ಆಮ್ಚಿ ಮಾಂಯ್ ಭಾಸ್
ಸಂವಿಧಾನಾ ಆಟ್ವ್ಯಾ ವೊಳೆರಿಂತ್  ಪಾವ್ಲಿ
ತಕ್ಲೆರ್ ಭಾಂಗ್ರಾ ಮುಕುಟ್ ಘೆವ್ನ್
ರಾಣ್ಯೆ  ಭಾಶೆನ್ ಸೊಭೊಂಕ್ ಲಾಗ್ಲಿ.

ಕೊಂಕ್ಣಿ ಆಮ್ಚಿ ಆವಯ್ ಭಾಸ್
ಸದಾಂಚ್ ತಿ ಜಿವಿ  ಉರೊಂ
ಹೆರ್ ಭಾಸ್ ವ್ಯವಹಾರಾಕ್ ಜಾಯ್ ತರಿ
ಕೊಂಕ್ಣೊ-ಕೊಂಕ್ಣೊ ಭೆಟ್ತಾನಾ ಜಿಬೆರ್ ವಾಳೊಂ

ತ್ಯಾಗ್,  ಬಲಿದಾನ್, ಸಾಕ್ರಿಫಿಸ್, 
ವಾಂವ್ಟಿಚೊ ಫಳ್ ಸಭಾರಾಂಚೊ
ಸಂಸಾರ್ ಸಾಂಡುನ್ ತೆ ಗೆಲ್ಯಾತ್ ತರಿ
ಉಡಾಸ್ ಆಸೊಂ ಕಾಳ್ಜಾಂತ್ ಜಿವೊ

ಹಿಂದು ಕ್ರಿಸ್ತಾಂವ್ ಮುಸ್ಲಿಂ ತರಿ
ವೆವೆಗ್ಳ್ಯಾ ನಾದಾಚಿ ಬೊಲಿ ತರಿ
ಕೊಂಕ್ಣಿ ಮಾಯೆಚಿಂ ಬಾಳಾಂ ಆಮಿ
ಕೊಂಕ್ಣಿ ಮಾಯೆಕ್ ಸದಾಂಚ್ ಋಣಿ

ಕೊಂಕ್ಣಿ ಮಾನ್ಯತಾ ದಿಸಾ 
ಕೊಂಕ್ಣಿ ಮಾಯೆಕ್ ನಮಾನ್ ಕರ್ಯಾಂ. 
ಜಾತ್ ಮತ್-ಬೇಧ್ ನಾಸ್ತಾಂ, 
ಎಕ್ವಟಾನ್ ತಿಚಿ ಸೆವಾ ಕರ್ಯಾಂ.

 

ಜ್ಯೂಲಿಯೆಟ್ ಫೆರ್ನಾಂಡಿಸ್ (ಮೊರಾಸ್)
ಕೊಟ್ಟಾರ ಕ್ರಾಸ್ ವಾಡೊ