ಪ್ರಜಾಪ್ರಭುತ್ವಾಂತ್ ಶಿಸ್ತ್ - ಲೇಖಕ್: ಡೊನ್ ಮ್ಯಾಕ್ಸ್ Back

'ಪ್ರಜಾಪ್ರಭುತ್ವಾಂತ್ ಶಿಸ್ತ್' 

ವ್ಹಯ್ಲ್ಯಾ ವಿಶಾಂತ್ ಜಾಯ್ತಿಂ ಬರ್ಪಾಂ ಫಾಯ್ಸ್ ಜಾಲ್ಯಾಂತ್, ಚರ್ಚೆ ಆನಿ ತರ್ಕಾಂ ಚಲ್ಲ್ಯಾಂತ್. ಪರತ್ ಉಡಾಸ್ ಕಾಡ್ಚೆಂ ಗರ್ಜೆಚೆಂ ಜಾವ್ನಾಸಾ.

ಪ್ರಜಾಪ್ರಭುತ್ವ್ ಆನಿ ಶಿಸ್ತ್ ಹಾತಾಕ್ ಹಾತ್ ಧರ್ನ್ ಚಲ್ತಾತ್. ಶಿಸ್ತ್ ನಾತ್ ಲ್ಲೆಂ ಸ್ವಾತಂತ್ರ್ಯ್ ಕೆದಾಳಾಯ್ - ಘುಸ್ಪಡ್ ಗೊಂದೊಳ್, ಜಮ್ಯಾ ಗಲಾಟೊ, ಲೂಟ್ ಮಾರ್ ಉಬ್ಜಯ್ತಾ.

ಪ್ರಜಾಪ್ರಭುತ್ವ್ ಮ್ಹಳ್ಯಾರ್ ಕಿತೇಂಯಿಂ ಕರುಂಕ್ ಸ್ವಾತಂತ್ರ್ಯ್ ವಾಲೈ ಸೆನ್ಸ್ ನ್ಹಯ್ ಮ್ಹಳ್ಳೆಂ ಆಮಿ ಸರ್ವ್ ಬರೆಂ ಜಾಣಾಂವ್. ಸಭಾರ್ ಪಾವ್ಟಿಂ ಪ್ರಜಾಪ್ರಭುತ್ವಾಂತ್ ಚೂಕ್ ಸಮ್ಜಣೆನ್ ಹಕ್ಕಾಂ  ಆನಿ ಸ್ವಾತಂತ್ರ್ಯಾ ಚೊ ದುರುಪಯೋಗ್ ಜಾತಾ.

ಪ್ರಜಾಪ್ರಭುತ್ವಾಂತ್ ಪರ್ಜೆಕ್ (ನಾಗರಿಕಾಂಕ್) ತಾಂಚಿಂ ದೂರಾಂ ದಾಖಲ್ ಕರುಂಕ್, ನ್ಯಾಯ್ ಜೊಡುಂಕ್ ನಿತಿ ಕಾನೂನಾ ಪ್ರಕಾರ್ ಶಾಂತಿಯುತ್ ವಾಟೊ ಆಸಾತ್. ಪುಣ್ ಹ್ಯಾ ಖಾತಿರ್ ಕಾನೂನ್ ಹಾತಿಂ ಘೆಂವ್ಕ್ , ಹಿಂಸಾ ಆಧಾರೂಂಕ್, ಸರ್ವಜಣಿಕ್ ವಸ್ತು ನಾಸ್ ಕರುಂಕ್ ಕೊ ಣಾಯ್ಕಿ ಹಕ್ಕ್ ನಾ.

ಮಹಾತ್ಮಾ ಗಾಂಧೀಜಿನ್ ಸಾಂಗ್ ಲ್ಲೆಂ ಆಸಾ: ಲೊಕಾ ಮಧ್ಲ್ಯಾ ನಯ್ತಿಕ್ ಶಿಸ್ತೆವಯ್ರ್ ಪ್ರಜಾಪ್ರಭುತ್ವಾಚೆಂ ಜಯ್ತ್ ಆಸಾ ಮ್ಹಣ್. ಜರ್ತರ್ ಸರ್ವ್ ನಾಗರಿಕ್ ನಯ್ತಿಕ್ ಸಂಯಮಾನ್ ಚಲ್ತಿತ್ ತರ್, ಪ್ರಜಾಪ್ರಭುತ್ವಾಚೆಂ ಮಹಾನ್ ಜಯ್ತ್ ಜಾತಲೆಂ. ಪ್ರಜಾಪ್ರಭುತ್ವ್ ಮ್ಹಳ್ಯಾರ್ ಫಕತ್ ಹಕ್ಕಾಂಚೊ ಅನ್ಭೋಗ್  ಕರ್ಚೊ ನ್ಹಯ್. ಪುಣ್ ತಾಚಾಕೀ ಚಡ್ ತಿಂ ಹಕ್ಕಾಂ ಅನ್ಭೋಗ್ ಕರುಂಕ್ ಗರ್ಜೆಚೆಂ ವಾತಾವರಣ್ ಸೃಷ್ಟಿ ಕರ್ಚೆಂಯೀ ಜಾವ್ನಾಸಾ.

ಪ್ರಜಾಪ್ರಭುತ್ವಾಂತ್ ಥೊಡಿಂ ನಿರ್ದಿಷ್ಟ್ ಕರ್ತ ವ್ಯಾಂ ಪಾಳಿನಾತ್ಲ್ಯಾರ್ ಹಕ್ಕಾಂಚೊ ಭರ್ವಸೊ ಮೆಳಾನಾ. ಆಜ್ ಸಂಸಾರಾಂತ್ ಚಡ್ ಅಭಿವೃದ್ಧಿ ಜಾಲ್ಲೆ ದೇಶ್ ಜಾವ್ನಾಸಾತ್, ಶಿಸ್ತೆಕ್ ನಾಂವಾಡ್ ಲ್ಲೆ: ಜಪಾನ್, ಜರ್ಮನಿ, ಸ್ವಿಟ್ಜರ್ಲೇಂಡ್ ಇತ್ಯಾದಿ. ಜಪಾನಾಂತ್ ಭುರ್ಗಿಂ, ಜಲ್ಮಾ ತಾನಾಂಚ್ ಮ್ಹಳ್ಳೆ ಪರಿಂ ಶಿಸ್ತ್ ಶಿಕ್ತಾತ್ ಮ್ಹಳ್ಳ್ಯಾ ವಿಶಾಂತ್ ವೋಟ್ಸ್ಯಾ ಪಾರ್ ಥೊಡೆ ವಿಡಿಯೋ ಆಮಿ ಪಳಯ್ತಾಂವ್. ದುಸ್ರ್ಯಾ ಮಹಾಝುಜಾಂತ್ ಜಪಾನ್ ಆನಿ ಜರ್ಮನಿ ಧರ್ಣಿಕ್ ಆಪ್ಟಾಲ್ಲೆ ದೇಶ್ ಜಾವ್ನಾಸಾತ್. ಜಪಾನಾಂತ್ ತವಳ್ ತವಳ್ ಭುಂಯ್ ಕಾಂಪಿ, ಸುನಾಮಿ ತಸಲಿಂ ನಯ್ಸರ್ಗಿಕ್ ಅನಾಹುತಾಂ ಜಾಂವ್ನ್ ದೆಸ್ವಾಟ್ ಜಾಂವ್ಚಿ ಆಮಿ ಜಾಣಾಂವ್. ತರ್ಯೀ ಹೆ ದೇಶ್ ವಿಜ್ಞಾನ್ ತಂತ್ರಜ್ಞಾ ನಾಂತ್, ಆರ್ಥಿ ಕತೆಂತ್ ಮುಕಾರ್ ಆಸಾತ್ ತರ್, ಕಾರಣ್ ಹರ್ಯೆಕಾ ಕ್ಷೇತ್ರಾಂತ್ ಥೈಂಚಾ ಲೊಕಾನ್ ಪಾಳ್ಚಿ ಶಿಸ್ತ್. ಆಜ್ ಹ್ಯಾ ದೇಶಾಂನಿ ಪ್ರಜಾಪ್ರಭುತ್ವ್ ಜಯ್ತೆವಂತ್ ಜಾಂವ್ಕ್ ಕಾರಣ್ ಹೆಂಚ್ ಜಾವ್ನಾಸಾ.

ಹಾಕಾ ತದ್ವಿರುದ್ಧ್ ಜಾವ್ನ್ ಏಷ್ಯಾ , ಆಫ್ರಿಕಾ ಆನಿ ಲ್ಯಾ ಟಿನ್ ಅಮೇರಿಕಾಚಾ ಸಭಾರ್ ದೇಶಾಂನಿ ಆಜ್ ಪ್ರಜಾಪ್ರಭುತ್ವ್ ಸಲ್ವಾಲಾಂ ತರ್, ತಾಕಾ ಕಾರಣ್ ಥೈಂಚಾ ಲೊ ಕಾ ಥೈಂ ರಾಜ್ ಕರ್ಚಿ ಅಶಿಸ್ತ್. ತಾಂಕಾಂ ಪ್ರಜಾಪ್ರಭುತ್ವಾಚಿಂ ಮೌಲ್ಯಾಂಚ್ ಕಳಿತ್ ನಾಂತ್. ಶಿಸ್ತ್ ನಾತರ್ ಪ್ರಜಾಪ್ರಭುತ್ವ್ ಬಾಳ್ವೊಂಕ್ ಕಷ್ಟ್. ಥೈಂಸರ್ ಸರ್ವಾಧಿಕಾರ್ ಯೇಂವ್ಕ್ ಆವ್ಕಾಸ್ ಜಾತಾ. ಆಮ್ಚಾ ಸೆಜಾರ್ಚಾ ಪಾಕಿಸ್ಥಾನಾಂತ್ ಹೆಂ ಆಮಿಂ ಪಳೆವ್ನ್ ಆಸಾಂವ್.

ಆಮ್ಚಾ ದೇಶಾಂತ್ ಥರಾವಳ್ ಜಾತಿಕಾತಿಂಚೊ , ಧರ್ಮಾಂಚೊ ಲೋಕ್ ಆಸೊನ್, ವಿಪರೀತ್ ಜಣಾಸಂಖೊ ಆಸ್ಲ್ಯಾರೀ ಗರ್ಜ್ ಪಡ್ಚಿ ಶಿಸ್ತ್ ಸಾಂಭಾಳುನ್ ಆಯಿಲ್ಲ್ಯಾನ್, ಹಾಂಗಾಸರ್ ಪುನ್ಯಾನ್ ಪರ್ಜೆ ಪ್ರಭುತ್ವ್ ಉರ್ಲಾಂ. ಭ್ರಷ್ಟಾಚಾರ್, ಕಾಯ್ದೆ ಮೊಡ್ಚಿ ಸವಯ್, ಸ್ವಾರ್ಥ್ , ಕಾನೂನಾಚಿ ನಿರ್ಲಕ್ಷಾ ಇತ್ಯಾದಿ ಅಶಿಸ್ತೆಚಿಂ ಲಕ್ಷಣಾಂ ಜಾವ್ನಾಸ್ತಾತ್. ಹರ್ಯೆ ಕಾಕ್ ಯೀ ಸರ್ಕಾ ರಾಕ್ ದುರ್ಸೊಂಚಾ ಬದ್ಲಾಕ್ ಆಮಿ ಕಿತ್ಲ್ಯಾ ಜವಾಬ್ದಾರೆನ್ ಚಲ್ತಾಂವ್ ತೆಂ ಚಿಂತಿಜಾಯ್. ಆತಾಂಚಾ ವಿಷಮ್ ಪರಿಸ್ಥಿತೆಂತ್ ಕೋವಿಡ್ ವಿಸ್ತಾರ್ಚೆಂ ಆಡಾಂವ್ಕ್ ಸರ್ಕಾರಾನ್ ಘಾಲ್ಲಿಂ ನಿಯಮಾಂ ಕಿತ್ಲಿಂ ಜಣಾಂ ಪಾಳ್ತಾತ್ ತೆಂ ಚಿಂತಿಜಾಯ್. ಸರ್ಕಾರಾನ್ ಬರೆಂ ಆಡಳ್ತೆಂ ಚಲಯ್ಜೆ ತರ್ ಪರ್ಜೆಚೊ ಸಹಕಾರ್ ಅತೀ ಗರ್ಜ್ .

ಆಮ್ಚಾ ದೇಶಾಂತ್ ಕರಾವಳಿ ಕಥೋಲಿಕ್ ಕ್ರಿಸ್ತಾಂವ್ ಲೋಕ್ ವರ್ತ್ಯಾ ಶಿಸ್ತೆಕ್ ನಾಂವಾಡ್ಲಾ. ಆಮ್ಚಾ ಧಾರ್ಮಿ ಕ್ ಆನಿ ಸಾಮಾಜಿಕ್ ಕಾರ್ಯಾ ವಳಿಂನಿ ಆಮ್ಚಿ ಶಿಸ್ತ್ ಪಳೆವ್ನ್ ಹೆರ್ ಧರ್ಮಾಂಚೊ ಲೋಕ್ ಆಮ್ಕಾಂ ಹೊಗಳ್ಸಿ ತಾ. ಹ್ಯಾ ಶಿಸ್ತೆಕ್ ಆಮ್ಚಾ ಧಾರ್ಮಿ ಕ್ ಮುಖೆಲ್ಯಾಂಚಿ ಮೇಲ್ಫಾಂಕ್ತ್ ಕಾರಣ್ ಯೀ ಮ್ಹಣ್ಯೆತ್. ಹಿ ಶಿಸ್ತ್ ಸಾಂಭಾಳ್ನ್ ವರ್ತಾ ನಾ ಆಮ್ಚಾ ಮುಖ್ಲೆ ಪಿಳ್ಗೆಕ್ ಯೀ ಫಾವೊತಿ ತರ್ಭೆ ತಿ ದಿಂವ್ಚಿ ಜವಾಬ್ದಾರಿ ಆಮ್ಚಿ ಜಾವ್ನಾಸಾ.

 

ಲೇಖಕ್: ಡೊನ್ ಮ್ಯಾಕ್ಸ್ | ಗೊಲ್ಲಚ್ಚಿಲ್ ವಾಡೊ