ಜೂನ್ 14 ರಗ್ತಾದಾನಿಂಚೊ ದೀಸ್, ಲೇ: ಫೆಲ್ಸಿ ಲೋಬೊ ದೆರೆಬಯ್ಲ್ Back

ಜೂನ್ 14 ರಗ್ತಾದಾನಿಂಚೊ ದೀಸ್

ವಿಜ್ಞಾನಿ ಕಾರ್ಲ್ ಲ್ಯಾಂಡ್‍ಸ್ಟೈನರ್ ಹಾಚೊ ಜಲ್ಮಾ ದೀಸ್ ಹೊ. ತೊ 1868 ವ್ಯಾ ವರ್ಸಾ ಜೂನ್ 14ವೆರ್ ಜಲ್ಮಾಲೊ. ರಗ್ತಾಚೆ  ಚಾರ್ ವರ್ಗ್, ಎ, ಬಿ, ಎಬಿ ಆನಿ ಒ, ಸೊಧುನ್ ಕಾಡ್ನ್ ವಡ್ ದಾಖ್ಲೊ ರಚ್ಲೆಲ್ಯಾ ಹಾಕಾ ರಗ್ತಾವರ್ಗಾವಣೆಚೊ ಬಾಪುಯ್ ಮ್ಹಣ್ ಗೌರವ್ ದಿಲಾ. ಅಂತರಾಷ್ಟ್ರೀಯ್ ರಕ್ತಾದಾನಿಂಚೊ ದೀಸ್ ಜೂನ್ 14ವೆರ್ ದೆಕುನ್ ಆಚರ್ಸಿತಾತ್.

ಆಮಿ ಸಂಸಾರ್‍ಭರ್ ಆಜ್ ಪಳೆಂವ್ಚೆ ತÀರ್ ಅಸಂಖ್ಯ್  ಜಣಾಂಕ್ ರಗಾತ್ ದಾನ್ ದಿಂವ್ಚೆಂ ಪಡ್ತಾ. 1665ಂತ್ ಪಯ್ಲೆ ಪಾವ್ಟಿಂ ರಗ್ತಾದಾನಾಚೆಂ ವಿಧಾನ್ ಆರಂಭ್ ಜಾಲೆಂ. ಆರಂಬಾಕ್ ಮನ್ಜಾತಿ ಥಾವ್ನ್ ಮನ್ಜಾತಿಂ ವಯ್ರ್ ಹೆಂ ಪ್ರಯೋಗ್ ಕರ್ನ್ ಯಶಸ್ವಿ ಕೆಲೆಂ. ಬ್ರಿಟಿಷ್ ಬಾಂಳ್ತಿ ತಜ್ಞ್ ಜೇಮ್ಸ್ ಬ್ಲುಂಡೆಲ್ ಹಾಣೆಂ ಬಾಳಾಂತ್ ಸ್ತ್ರೀಯೆಕ್ ಯಶಸ್ವಿ ರಿತಿನ್ ರಗ್ತಾದಾನ್ ವಿಧಾನ್ ವಾಪರ್ನ್ 1818ಂತ್ ದಾಖ್ಲೊ ರಚ್ಲೊ. ರಗ್ತಾಂತ್ ವಿಭಾಗ್ ಸೊಧುನ್ ಕಾಡ್ತಚ್, ರಗ್ತಾದಾನಾಚಿ ಪ್ರಕ್ರಿಯಾ ಮಾತ್ಸಿ ಸುಲಭ್ ಜಾಂವ್ಕ್ ಪಾವ್ಲಿ. 1914 ಥಾವ್ನ್ 1918 ಅವ್ದೆರ್ ರಗಾತ್ ಸಂರಕ್ಷಣ್ ಕರ್ನ್ ವಾಪರ್ಯೆತ್ ಮ್ಹಳ್ಳಿ ಸಂಗತ್ ಸಂಸೊದಾ ಪ್ರಕಾರ್ ಗಿನ್ಯಾನಾಕ್ ಆಯ್ಲಿ ತೆದ್ನಾ ಸ್ವಯಂ ಪ್ರೇರಣಾನ್ ರಗ್ತಾದಾನ್ ಕರ್ಚೆಂ ವಿಧಾನ್ ಲೊಕಾ ಮೊಗಾಳ್ ಜಾಂವ್ಕ್ ಪಾವ್ಲೆಂ. ಹೊ ಕಾಳ್ ಜಾಗತಿಕ್ ಮ್ಹಾ ಝುಜಾಂಚೊ ಜಾಲ್ಲ್ಯಾನ್ ಘಾಯೆಲ್ಲ್ಯಾಂಕ್ ಮಾರಣಾಂತಿಕ್ ಸ್ಥಿತೆಕ್ ಪಾವ್ಲೆಲ್ಯಾಂಕ್ ಹೆಂ ವಿಧಾನ್ ಭೋವ್ ಮೊಲಾಧಿಕ್ ದೆಣೆಂ ಜಾಂವ್ಕ್ ಪಾವ್ಲೆಂ ಮ್ಹಳ್ಳ್ಯಾಂತ್ ಫಟ್ ನಾ.

ಪೆಲ್ಯಾಚೊ ಜೀವ್ ವಾಂಚಂವ್ಕ್ ಕಿತೆಂಚ್ ಅಪೇಕ್ಷಾ ಕರಿನಾಸ್ತಾಂ, ಸ್ವಯಂ ಪ್ರೇರಿತ್ ಜಾವ್ನ್ ರಗಾತ್ ದಾನ್ ದಿಂವ್ಚೆಂಚ್ ಜಾವ್ನಾಸಾ ರಗ್ತಾದಾನ್. ದಾನಿಂಚ್ಯಾ  ರಗ್ತಾಂತ್ಲ್ಯಾ ತಾಂಬ್ಡೆ ರಗ್ತಾಕಣ್, ಪ್ಲಾಸ್ಮಾ, ಪ್ಲೇಟ್‍ಲೆಟ್ಸ್ ಇತ್ಯಾದಿಂಚಿ ತಪಾಸ್ಣಿ, ಆನಿ ಹೆಪಟೈಟಿಸ್ ಬಿ, ಹೆಪಟೈಟಿಸ್ ಸಿ, ಹೆಚ್.ಐ.ವಿ., ವ ಇತÀರ್ ಗುಪ್ತ್ ಪಿಡೆಂಚಿ ಸೊದ್ನಾಂ ಕರ್ನ್ ದಾನಿ ಭಲಾಯ್ಕೆವಂತ್ ಆಸಾ ತರ್ ಮಾತ್ರ್ ತಾಚೆಂ ರಗಾತ್ ವರ್ಗಾವಣೆಕ್ ಯೋಗ್ಯ್ ಅಶೆಂ ಥರಾಯ್ತಾತ್.

ರಗ್ತಾಂತ್ಲೆ ತಾಂಬ್ಡೆ ರಗ್ತಾಕಣ್ 35 ದೀಸ್ ಪರ್ಯಾಂತ್ ಮಾತ್ರ್ ಆಪ್ಲಿ ಸಕತ್ ಉರವ್ನ್ ಘೆಂವ್ಕ್ ಪಾವ್ತಾತ್, ಪ್ಲೇಟ್‍ಲೆಟ್ಸ್ 5 ದೀಸ್ ಆನಿ ಪ್ಲಾಸ್ಮಾ ಏಕ್ ವರಸ್ ಪರ್ಯಾಂತ್ ಜಗವ್ನ್ ದವರುಂಕ್ ಸಕ್ತಾ ಮ್ಹಳ್ಳೆಂ ಆಯ್ಚೆಂ ವಿಜ್ಞಾನ್ ಆನಿ ವಯ್ಜಾಕೀಯ್ ವಾಡವಳ್ ದೃಢ್ ಕರ್ತಾ. ರಗ್ತಾದಾನ್ ಕರ್ತಾನಾ ಸಾಮಾನ್ಯ್ ಜಾವ್ನ್ ಥೊಡ್ಯೊ ಚೂಕ್ ಅಭಿಪ್ರಾಯೊ ಸಯ್ತ್ ಲೊಕಾಂ ಮಧೆಂ ಪಾಸಾಯೊ ಮಾರ್ತಾತ್. ಪೂಣ್ ನಿರಂತರ್ ರಗಾತ್ ದಾನ್ ದಿತೆಲ್ಯಾಂಕ್ ಭಲಾಯ್ಕೆಚೆ ವಾಂದೆ ಜಾಯ್ನಾಸ್ತಾಂ ಜಾಯ್ತ್ಯಾ ಪಿಡೆಂ ಥಾವ್ನ್ ತೆ ಮುಕ್ತ್ ಆಸ್ಚೆಂ ಸಯ್ತ್ ಕಳೊನ್ ಆಯ್ಲಾಂ.

ರಗ್ತಾದಾನಾ ವರ್ವಿಂ ಜಾಂವ್ಚೊ ಫಾಯ್ದೊ ಕಿತೆಂ? ರಗಾತ್ ದಾನ್ ದಿಲ್ಲ್ಯಾಂತ್ ಕುಡಿಂತ್ಲೊ ಲೊಕ್ಡಾಂಚೊ ಅಂಶ್ ಎಕಾ ಪ್ರಮಾಣಾರ್ ಉರಂವ್ಕ್ ಜಾತಾ ಮ್ಹಣ್ ಸಂಸೊದ್ ಸಾಂಗ್ತಾತ್. ಕುಡಿಂತ್ ಲೊಂಕ್ಡಾ ಅಂಶ್ ಉಣೊ ಜಾಲ್ಯಾರೀ ಸಮಸ್ಯೆ, ಚಡ್ ಜಾಲ್ಯಾರೀ ಸಮಸ್ಯೆ ಜಾತಾತ್ ಹೆಂ ಆಮಿ ಜಾಣಾಂವ್. ರಗ್ತಾದಾನ್ ಕೆಲ್ಲ್ಯಾನ್ ದಾನಿಚ್ಯಾ ಕುಡಿಂತ್ ನವೆಂ ಭಲಾೈಯ್ಕೆಭರಿತ್ ರಗಾತ್ ಉತ್ಪನ್ನ್  ಜಾವ್ಯೆತ್. ಹ್ಯಾ ವರ್ವಿಂ ತಾಚ್ಯಾ ಕುಡಿಂತ್ ಭಲಾಯ್ಕಿ, ಉಗ್ಡಾಸಾಚಿ ಸಕತ್, ಚುರುಕಾಯ್ ನವ್ಸರೊಂಕ್ ಸಕ್ತಾ. ತಾಚ್ಯಾ ಕುಡಿಂತ್ಲೆಂ ಕೊಲೊಸ್ಟ್ರಾಲ್ ಪ್ರಮಾಣ್ ಸಾರ್ಕೆಂ ಉರವ್ಯೆತ್. ರಗಾತ್ ದಾನ್ ದಿಲ್ಲೆಂಚ್, ನವೆ ರಗ್ತಾಕಣ್ ಜೆ ಉತ್ಪನ್ನ್ ಜಾತಾತ್, ತೆ ಕುಡಿಂತ್ಲೆಂ ರೋಗ್ ನಿರೋಧಕ್ ಸಕತ್ ಚಡಂವ್ಕ್ ಕಾರಣ್ ಜಾತಾತ್. ಆಶೆಂ ಬರ್ಯಾ ಭಲಾಯ್ಕೆಂತ್ ದಾನಿ ಉರೊಂಕ್ ಚಡ್ ಸಲೀಸ್ ಜಾತಾ.

ರಗ್ತಾಚಿ ವಿಶೇಷತಾ ಕಸಲಿ?:- ರಗ್ತಾಕ್ ಪರ್ಯಾಯ್ ಜಾವ್ನ್ ಹೆರ್ ಖಂಚಿ ವಸ್ತ್ ನಾ. ಎಕಾ ಮನ್ಶಾ ಕುಡಿಂತ್ 70 ಪರ್ತಿತ್  ರಗ್ತಾಚೊ ಭಾಗ್ ಜಾವ್ನಾಸಾ. ರಗಾತ್ ಕೃತಕ್ ಜಾವ್ನ್ ಉತ್ತನ್ನ್ ಕರುಂಕ್ ಜಾಯ್ನಾ ವಯಸ್ಕ್ ವ್ಯಕ್ತಿಚ್ಯಾ ಕುಡಿಂತ್ 8 ಥಾವ್ನ್ ಧಾ ಯೂನಿಟ್, ಮ್ಹಳ್ಯಾರ್ 5 ಥಾವ್ನ್ 6 ಲೀಟರ್ ರಗಾತ್ ಆಸ್ತಾ.

ರಗಾತ್ ಪಿಡಾ ಆಡಾಂವ್ಕ್ ಆನಿ ಘಾಯ್ ಘಡ್ಸುಂಕ್ ಸಸಾಯ್ ಕರ್ತಾ.

ರಗಾತ್ ದಾನ್ ದಿತಾನಾ ಸುವಿ ತೊಪ್‍ಲ್ಲೊ ಅನ್ಭೋಗ್ ಮಾತ್ರ್ ಜಾತಾ. ವೀಸ್ ಮಿನುಟಾಂನಿಂ ರಗಾತ್ ದಾನ್ ದಿಲ್ಲೊ ದಾನಿ ಪರತ್ ಸುದ್ರಾಪ್ ದೆಖೊಂಕ್ ಸಕ್ತಾ, ತಾಕಾ ಅಸ್ಕತ್ಕಾಯ್ ವ ಹೆರ್ ಕಿತೆಂಯ್ ವಾಯ್ಟ್ ಪರಿಣಾಮ್ ಜಾಯ್ನಾಂತ್. ಆಮ್ಚ್ಯಾ ದೇಶಾಂತ್ ಹರ್ 2 ಸೆಕುಂಡಾಂಕ್ ಎಕಾ ಪಿಡೆಸ್ತಾಕ್ ರಗ್ತಾಚಿ ಗರ್ಜ್ ಆಸಾ. ಥಲಸ್ಸೆಮಿಯಾ ಆನಿ ಲ್ಯುಕೆಮಿಯಾ ಪಿಡೆಸ್ತಾಂಕ್ ರಗಾತ್ ಅಧಿಕ್ ಗರ್ಜ್ ಆಸ್ತಾ. 2 ಮಹಿನ್ಯಾಂಕ್ ಏಕ್ ಪಾವ್ಟಿಂ ಹ್ಯಾ ಪಿಡೆಸ್ತಾಂಕ್ ರಗಾತ್ ಒದಗ್ಸಿನಾತರ್ ತಾಂಕಾಂ ಭಲಾಯ್ಕಿ ಭಾಗ್ತಾ.

ರಗಾತ್ ದಾನ್ ದಿತಾನಾ ಗಮಾನಾಂತ್ ದವಚ್ರ್ಯೊ ಸಂಗ್ತಿ.

• ದಾನಿಕ್ 10 ವರ್ಸಾಂ ಉತ್ರಾಲ್ಲಿಂ ಆಸೊಂಕ್ ಜಾಯ್
• ತಾಂಚೆಂ ಹಿಮೋಗ್ಲೊಬಿನ್ ಅಂಶ್ 12.5 ಪ್ರಾಚ್ ಚಡ್ ಆಸ್ಚೆಂ ಬರೆಂ.
• ರಗ್ತಾದಾನ್ ದಿಂವ್ಚ್ಯಾ ಆದ್ಲ್ಯಾ ರಾತಿಂ ಬರೀ ನೀದ್ ಪಡ್‍ಲ್ಲಿ ಆಸೊಂಕ್ ಜಾಯ್.
• ದಾನ್ ದಿಂವ್ಚ್ಯಾ ಆದಿಂ ತೀನ್ ದಿಸಾಂನಿ ಖಂಚಿಂ ವಕ್ತಾಂ ಸೆವ್‍ಲ್ಲಿ ಆಸ್ಚಿಂ ನಜೊ
• ರಗ್ತಾದಾನಿಚೆಂ ವಜನ್ 45 ಪ್ರಾಚ್ ಚಡ್ ಆಸೊಂಕ್ ಜಾಯ್
• ತಾಚಿ ರಗ್ತಾದಾಬ್ 160/90mm/mg  ಭಿತರ್ ಆಸ್ಚಿ ಗರ್ಜ್
• ದಾನಿಕ್ ಹೆಪಟೈಟಿಸ್‍ಬಿ ಆನಿ ಸಿ ಪಿಡಾ ಆಸಾನಾಯೆ
• ಏಡ್ಸ್ ತಸಲಿ ಪಿಡಾ ಆಸ್‍ಲ್ಲ್ಯಾಂನಿ ರಗ್ತಾದಾನ್ ದಿಂವ್ಚೆಂ ನ್ಹಂಯ್.
• ಗೋಡ್‍ಮುತಾಚಿ ಪಿಡಾ, ಕ್ಯಾನ್ಸರ್, ಕೊಡ್ ಅಸಲ್ಯಾ ಗಂಭೀರ್ ಪಿಡೆ ಲಕ್ಷಣಾಂಚ್ಯಾ ವ್ಯಕ್ತಿಂಕ್ ರಗಾತ್ ದಾನ್ ದೀಂವ್ಕ್ ಅಡ್ವಾರ್ತಾ ಎಕಾ  ವರ್ಸಾಚೆ ಆವ್ದೆಂತ್ ಹಳ್ದುವೊ ರೋಗ್ ಆಯ್ಲಾ ತರ್ ತಾಣೆಂ ರಗಾತ್ ದಾನ್ ದೀನಾಯೆ.
• ಮಲೇರಿಯಾ, ಅಲರ್ಜಿ, ರಗ್ತಾ ಸಂಬಂಧಿ ಪಿಡೆ ಲಕ್ಷಣಾಂ ಅಸ್‍ಲ್ಯಾಂನಿ ರಗಾತ್ ದಾನ್ ದೀನಾಯೆ
• ರೋಗ್ ನಿರೋಧಕ್ ಇಂಜೆಕ್ಷನ್ ಘೆತ್ಲೆಲ್ಯಾ ಎಕಾ ಮಹಿನ್ಯಾ ವರೇಗ್ ರಗಾತ್ ದಾನ್ ದಿಂವ್ಚೆಂ ನ್ಹಯ್
• ಅವ್ಘಡಾಕ್ ಸಾಂಪ್ಡೊನ್ ದಾಂತಾ ಸಂಬಂಧಿ ಶಸ್ತ್ರ್‍ಕ್ರಿಯಾ ಕೆಲ್ಲಿ ಆಸಾ ತರ್, ಎಕಾ ಮಹಿನ್ಯಾ ಪರ್ಯಾಂತ್ ರಗ್ತಾ ದಾನ್ ತಸಲ್ಯಾಂನಿ ಆಡಾಂವ್ಚೆ ಯೋಗ್ಯ್
• ಸಂಪೂರ್ಣ್ ಭಲಾಯ್ಕೆಭರಿತ್ ವ್ಯಕ್ತಿಂನಿಂ ಮಾತ್ರ್ ರಗಾತ್ ದಾನ್ ದಿಂವ್ಚೆ ಗರ್ಜ್. ದಾನ್ ದಿಂವ್ಚ್ಯಾ ವೆಳಿಂ ತಾಪ್, ಶೆಳ್ ಅಸಲ್ಯಾ ಸಂದರ್ಭ ಥಾವ್ನ್ ಜಾಗ್ರುತ್ ಆಸ್ಚೆಂ ಬರೆಂ.
• ಎಕ್ ಪಾವ್ಟಿಂ ರಗಾತ್ ದಾನ್ ದೀವ್ನ್ ಪರತ್ ಅನ್ಯೇಕ್ ಪಾವ್ಟಿಂ ದಾನ್ ಕರುಂಕ್ ತೀನ್ ಮಹಿನ್ಯಾಂಚೊ ಅಂತರ್ ಗರ್ಜ್.

ರಗಾತ್ ಜೀವ್ ದಿಂವ್ಪಿ ವರ್ತಿ ಸಕತ್. ಜೀವಾಚ್ಯಾ ತಾಡ್‍ವೊಡಿಂನಿಂ ರಗ್ತಾಚಿ ಗರ್ಜ್ ಅಸ್‍ಲ್ಲ್ಯಾ ಪಿಡೆಸ್ತಾಂಕ್, ದಾನ್ ಕರ್ನ್ ಜಾಯ್ತೆಂ ಬರೆಂಪಣ್ ಆಮಿ ಆಪ್ಣಾವ್ಯೆತ್. ಹೆಂ ಏಕ್ ಸಮಾಜ್‍ಮುಖಿ ಚಿಂತಾಪ್ ಹೆಂ ವಾಡವ್ನ್ ವರ್ಚೆಂ ಕಾಮ್ ಜಾಗ್ರತ್ ಆಸೊಂಕ್ ಜಾಯ್. ಜಾಯ್ತೆ ಸಂಘ್ ಸಂಸ್ಥೆ ಆಮ್ಚ್ಯಾ ಸಮಾಜೆಂತ್ ರಗ್ತ್‍ದಾನಾ ಶಿಬಿರಾಂ ಚಲವ್ನ್, ಮುಖಾರ್ ವ್ಹರುನ್ ಆಸಾತ್. ಸಭಾರ್ ವ್ಯಕ್ತಿ ಖಾಯಾಮ್ ಜಾವ್ನ್ ಆಸ್ಪತ್ರೆಕ್ ವಚೊನ್ ರಗಾತ್ ದಾನ್ ದೀವ್ನ್ ವೆತಾತ್. ರಗ್ತಾ ದಾನಾ ವರ್ವಿಂ ಆರ್ಥಿಕ್ ಆಡ್ಚಣೆಂತ್ ಆಸ್ಚ್ಯಾ ಪಿಡೆಸ್ತಾಂಕ್ ಆಮಿ ಸಸಾಯ್ ಕರ್ತಾಂವ್. ದಾನಾಂ ಭಿತರ್ಸ್ ವರ್ತೆಂ ದಾನ್ ರಗ್ತಾದಾನ್ ಮ್ಹಳ್ಳೆಂ ಮತಿಂತ್ ದವರ್ನ್ ಹ್ಯಾ ಮ್ಹಾನ್ ವಾವ್ರಾಕ್ ಆಮಿ ಪಾಟಿಂಬೊ ದಿಂವ್ಚಿ ಗರ್ಜ್ ಆಸಾ.

ಲೇ: ಫೆಲ್ಸಿ ಲೋಬೊ ದೆರೆಬಯ್ಲ್