ಕ್ರಿಸ್ತೀ ಮೌಲ್ಯಾಂ By ಹೆಲೆನ್ ಮಿನೇಜಸ್ Back

ಕ್ರಿಸ್ತೀ ಮೌಲ್ಯಾಂ

ಆಯ್ಚೊ ಸಂದೇಶ್ ಆಮಿ ಕ್ರೀಸ್ತಾಕ್ ನೆ಼ಸೊಂಕ್ ಜಾಯ್ ಮ಼ಣ್ಜೆ ಕ್ರೀಸ್ತಾಚೆ ಶೆಗುಣ್ ಆಮ್ಚೆ ಕರುಂಕ್ ಜಾಯ್. ತರ್, ಕ್ರೀಸ್ತಾಕ್ ನೆಸ್ಚೆಂ  ಮ಼ಳ್ಯಾರ್ ಕಿತೆಂ? ಆಮಿ ವಸ್ತುರ್ ನೆಸ್ತಾಂವ್ ಕಿತ್ಯಾಕ್ ಮ಼ಣ್ ಸಕ್ಡಾಂಕ್ ಕಳಿತ್ ಆಸಾ. 
ಏಕ್ ಪಾವ್ಟಿಂ ಭುರ್ಗ್ಯಾಂಲಾಗಿಂ ವಿಸಾರ್ಲೆಂ. ಆಮಿ ವಸ್ತುರ್ ನೆಸ್ಚೆಂ ಕಿತ್ಯಾಕ್? ಥೊಡ್ಯಾಂನಿ ಜಾಪ್ ದಿಲಿ ಆಮಿಂ ಸೊಭಿತ್ ದಿಸೊಂಕ್, ಥೊಡ್ಯಾಂನಿ , ಆಮ್ಚೆ ಮಾನ್ ಧಾಂಪುಂಕ್, ಆನಿ ಥೊಡ್ಯಾಂನಿ ನೆಸಾನಾ ಜಾಲ್ಯಾರ್ ಆಮ್ಕಾಂ ಲಜ್ ದಿಸ್ತಾ, ತರ್ ಆಮ್ಕಾಂ ನೆಸಣ್ ಭೊವ್ ಗರ್ಜೆಚೆಂ.
ಏಕ್ ಕಾಣಿ ಅಶಿ ಆಸಾ, ಏಕ್ ಗ್ರೇಸ್ತ್ ಮನಿಸ್ ಘರ್ ನಾತ್ ಲ್ಲ್ಯಾ ಮನ್ಶ್ಯಾಲಾಗಿಂ ಏಕ್ ಘರ್ ಬಾಂದುಂಕ್ ಸಾಂಗ್ತಾ.ಘರ್ ಬಾಂದ್ಚ್ಯಾ ಪಯ್ಲೆಂ ಗ್ರೇಸ್ತ್  ಮ಼ಣಾಲೊ " ಕಿತ್ಲೇಯ್ ಪಯ್ಶೆ ಕರ್ಚ್  ಜಾಲ್ಯಾರ್ ವ಼ಡ್ ನಾ, ಮಾಕಾ ಬಿಲ್ಲಾಂಚಿ ಗರ್ಜ್ ನಾ ತುಜೆ ಖುಶೆ  ಪ್ರಕಾರ್ ಬರೆಂ ಘರ್ ಬಾಂಧ್.
ದುಬ್ಳೊ ಚಿಂತ್ತಾ,ಧನ್ಯಾನ್ ಮಾಕಾ ಹೊ ಏಕ್ ಆವ್ಕಾಸ್ ದಿಲಾ, ತಾಚೊ ಬರೊ ಪ್ರಯೊಗ್ ಹಾವೆಂ ಕರುಂಕ್ ಜಾಯ್. ತೊ ಚಿಂತಾ ಹಾವೆಂ ಇತ್ಲೆಂ ಕರ್ಚ್ ಕರುನ್ ಬರೆಂ ಘರ್ ಬಾಂದ್ಚ್ಯಾ ಬದ್ಲಾಕ್ ಬಾಯ್ಲ್ಯಾನ್ ಪಳೆಂವ್ಕ್ ಬರೆಂ ದಿಸ್ಲ್ಯಾರ್ ಪುರೊ. ಭಿತರ್ ಲ್ಯಾನ್ ಕಸಲೆಂ ರುಕಾಡ್ ಕಸಲಿ ವಸ್ತು ಗಾಲ್ಯಾರೀ ತಿಂ ಪಳೆಂವ್ಕ್ ಕೊಣೀ ವಚನಾಂತ್. ಪಳೆಂವ್ಕ್ ಬರೆಂ ದಿಸ್ಲ್ಯಾರ್ ಪುರೊ ದೆಕುನ್ ತಶೆಂಚ್ ಘರ್ ಬಾಂದ್ಲೆಂ.
ಬಾಯ್ಲ್ಯಾನ್ ಬರೆಂ ಪುಣ್ ಭಿತರ್ಲ್ಯಾನ್  ತಿತ್ಲೆಂ ಬರೆಂ ನಾತ್ಲೆಂ ಘರ್ ಬಾಂದ್ಲೆಂಚ್. ನವ್ಯಾ ಘರಾಚಿ ಚಾವಿ ಆಪ್ಲ್ಯಾ ಧನಿಯಾಕ್  ದಿತಾ ಆನಿಂ ಮ಼ಣ್ತಾ "ತುವೆಂ ಸಾಂಗ್ಲ್ಯಾ ಪರ್ಮಾಣೆಂ ಹಾವೆಂ ಘರ್ ಉಬೆಂ ಕೆಲಾಂ".ತವಳ್ ಧನಿ ತಾಕಾ ಚಾವಿ ಪಾಟಿಂ ದಿತಾ ಆನಿಂ ಮ಼ಣ್ತಾ " ಧರ್ ಹಿ ಚಾವಿ ಆನಿ ಹೆಂ ಘರ್ ತುಕಾಚ್". ತವಳ್ ತೊ ಚುರ್ಚುರ್ತಾ ಆನಿಂ ಮ಼ಣ್ತಾ " ಹೆ ದೆವಾ ಹಾಂವೆ ಕಿತೆಂ ಕೆಲೆಂ? ಜರ್ ತರ್ ಹೆಂ ಘರ್ ಮಾ಼ಕಾ ಮ಼ಣ್ ಕಳಿತ್ ಆಸ್ಲೆಂ ತರ್ ಬರೆಂ ಕರ್ನ್ ಬಾಂಧ್ತೊಂ. ತವಳ್ ಧನಿ ತಾಕಾ ಮ಼ಣ್ತಾ "ತುಕಾ ಏಕ್ ಅವ್ಕಾಸ್ ದಿಲ್ಲೊ ಆತಾಂ ಚುರ್ಚುರ್ಲ್ಯಾರ್ ಉಪ್ಕಾರ್ ಪಾಡಾನಾ. ತುವೆಂ ಘರ್ ಬಾಂದ್ಲಾಂಯ್ ಚಲ್ ಭಿತರ್. ಆನಿಂ ದುಬ್ಳೊ ದುಸ್ರೊ ಉಪಾವ್ ನಾಸ್ತಾನಾ ಘರಾ ಭಿತರ್ ವೆತಾ ಆನಿಂ ಜಿಣಿ ಭರ್ ಚುರ್ಚು್ರ್ತಾ. 
ತಶೆಂಚ್ ದೇವ್ ಆಮ್ಕಾಂ ಆಮ್ಚಿ ಜಿಣಿ ಬರಿ ಕರುಂಕ್ ಜಾಯ್ತೊ ವೇಳ್ ಆವ್ಕಾಸ್ ದಿತಾ. ಹ್ಯಾ ಲಾಕ್ ಡೌನ್ ಕಾಳಾರ್ ಆಮ್ಚಿಂ ಕ್ರೀಸ್ತಿ ಮೌಲ್ಯಾಂ ಆಮಿ ಉಕಲ್ನ್  ಧರುನ್ ಏಕಾಮೆಕಾಚಾ ಘರ್ಜೆಂತ್ ಪಾವ್ಯಾಂ. ಭುರ್ಗ್ಯಾಂಕ್ ಮೀಸ್ ದೊತೊರ್ನ್ ನಾತ್ಲ್ಯಾ ಹ್ಯಾ ವೆಳಾರ್ ತಾಂಚೊ ಭಾವಾರ್ಥ್ ಥಿರ್ ಸಾಂಬಾಳುಂಕ್ ವ಼ಡಿಲಾಂ ತಾಂಕಾ ಆಧಾರ್ ದಿವ್ಯಾಂ. ಕ್ರೀಸ್ತಾಂವ್ ಮೋಗ್ ಶೆಗುಣ್ ತಾಂಚೆಂ ಥಂಯ್ ಜಳ್ತೊ ದವರ್ಯಾಂ. ಆಮಿಂ ತ್ಯಾ ದುಬ್ಳ್ಯಾ ಬರಿ ಉಪ್ರಾಂತ್ ಚುರ್ಚುರ್ಚ್ಯಾಕಿ ಆತಾಂಚ್ ಜಾಗಿಂ ಜಾವ್ಯಾಂ. ಮುಕ್ಲ್ಯಾ ಪಿಳ್ಗೆಕ್ ಬರೆಂ ಮಾರ್ಗದರ್ಶನ್  ದೀವ್ನ್ ತಾಂಚೆಂ ಜೀವನ್ ಕ್ರೀಸ್ತಿ ಮೌಲ್ಯಾಂನಿ ಪರ್ಜಳೊಂಕ್ ಆಮಿಂ ವಾವುರ್ಯಾಂ. ಕ್ರೀಸ್ತಾಕ್ ಆಪ್ಲ್ಯಾ ಜೀವನಾಂತ್ ನೆ಼ಸುನ್ ಹ್ಯಾ ಆಧುನಿಕ್ ಸಂಸಾರಾಂತ್ ಏಕ್ ಪರ್ಜಳ್ಚೆಂ ಮೊತಿಂ ಜಾವ್ನ್ ಸೊಭೊಂಕ್ ಆಮ್ಚ್ಯಾ ಭುರ್ಗ್ಯಾಂಕ್, ಯುವಕ್, ಯುವತಿಂಕ್ ಉತ್ತೇಜನ್ ದಿವ್ಯಾಂ. ಕ್ರೀಸ್ತಾಚೆ ಶೆಗುಣ್ ಆಮ್ಚ್ಯಾ ದಿಸ್ಪೊಡ್ತ್ಯಾ ಜಿಣ್ಯೆಂತ್ ನೆ಼ಸ್ಯಾಂ ಆನಿ ಕುಟ್ಮಾಚೆಂ ಮಾಗ್ಣೆಂ, ದೆವಾಚೆಂ ಉತರ್ ವಾಚುನ್, ನಿಯಾಳ್ ಕರುನ್ ಬರಿ ಕ್ರೀಸ್ತೀ ಭಾವಾಡ್ತಾನ್ ಭರ್ಲೆಲಿಂ ಕ್ರೀಸ್ತೀ ಕುಟ್ಮಾಂ ಬಾಂದುಂಕ್ ಪ್ರಯತನ್ ಕರ್ಯಾಂ. 

 ಹೆಲೆನ್ ಮಿನೇಜಸ್
 ಕೊಂಚಾಡಿ ಲೊವರ್ ವಾಡೊ.