ಕರೆಜ್ಮ್... ಲಾಕ್‍ಡೌನ್ ಆನಿ ಪಾಸ್ಖಾಂ ಫೆಸ್ತಾಚೊ ಸಂಭ್ರಮ್ 2020 Back
ಡಾ. ಜೂಡಿ ಪಿಂಟೊ, ಲ್ಯಾಂಡ್‍ಲಿಂಕ್ಸ್ ವಾಡೊ
ವರ್ಸ್ 2020 ಇಲ್ಲೆಂ ಚಡ್‍ಚ್ ವಿಶಿಷ್ಟ್ ಜಾಲಾಂ ತಶೆಂ ಭಗ್ತಾ. ಫೆಬ್ರವರಿಚಾ 26 ತಾರಿಕೆರ್ ಸಿಂಜಿಚ್ಯಾ ಬುದ್ವಾರಾ ಆಮಿಂ ಫಿûರ್ಗಜ್‍ಗಾರಾಂ ಹರ್ಶೆಂಚಾಬರಿಚ್ ಬೋವ್ ವ್ಹಡ್ ಸಂಖ್ಯಾನ್ ಇಗರ್ಜೆಂತ್ ಸಾಂಗಾತಾ ಮೆಳ್‍ಲ್ಲೊ ಉಗ್ಡಾಸ್ ತುಮ್ಚ್ಯಾ ಮತಿಂತ್ ಜಿವೊ ಆಸಾ ಜಾಂವ್ಕ್ ಪುರೊ. ತಾಚಾ ಉಪ್ರಾಂತ್ಲೆ ತೀನ್ ಆಯ್ತಾರ್ ಆಮಿಂ ಖಳೊಂಕ್ ನಾಂತ್ ತರೀ, ‘ಕೊರೊನಾ ವೈರಸ್’ ಚೀನಾದೇಶಾಥಾವ್ನ್ ಇಟಲಿ, ಸ್ಪೆಯ್ನ್, ಗಲ್ಫ್ ದೇಶಾಂಕ್ ವೊಚೊನ್ ಆಸ್ತಾಂ ಭಾರತಾಕೀ ಯೇವ್ನ್ ಆಸಾ ಮ್ಹುಳ್ಳಿ ಖಬಾರ್ ಆಮ್ಕಾಂ ಬೆಜಾರಾಯ್, ಖಂತ್ ಆನಿ ದೂಕ್ ದೀಂವ್ಕ್ ಪಾವ್ಲಿ. ಹ್ಯಾ ಮಧೆಂಯೀ ಆಮ್ಚ್ಯಾ ವಾಡ್ಯಾಚಿ ‘ಜಮಾತ್’ ಜಾಲ್ಲಿ ಆನಿ ತ್ಯಾ ದೀಸ್ ಆಮಿ 22 ತಾರಿಕೆರ್ ಆಮ್ಚ್ಯಾ ವಾಡ್ಯಾಚಿ ಲಿತುರ್ಜಿ ಆಸಾ ದೆಕುನ್, ವಿವಿಂಗಡ್ ಜವಾಬ್ದಾರ್ಯೊ ವಾಂಟುನ್, ತ್ಯಾ ಹಪ್ತ್ಯಾಂತ್ ವಾಟ್ಸಪ್ ಮುಖಾಂತ್ರ್ ವಾಚ್ಪಾಂ, ಕಂತಾರಾಂ ಆಶಾರ್ ಪಾಶಾರ್ ಕರ್ನ್ ಆಸ್ತಾನಾಂಚ್ ಮಾರ್ಚಾಚೆ 22 ತಾರೀಕ್ ‘ಲಾಕ್‍ಡೌನ್’ ಮ್ಹುಣ್ ಸರ್ಕಾರಾ ತರ್ಫೆನ್ ತಾಕೀದ್ ಜಾಲಿ. ತಾಚೆ ಉಪ್ರಾಂತ್ 21 ದಿಸಾಚೆಂ ‘ಲಾಕ್‍ಡೌನ್’ ಆಮಿಂ ಪಾಳ್ನ್ ಆಸಾಂವ್.
ಹ್ಯಾ ವರ್ಸಾಚೆಂ ಕರೆಜ್ಮ್ ಆಮಿಂ ಘರಾ ಭಿತರ್‍ಚ್ ಖರ್ಚಿಲ್ಲೆ ಬರಿ ಭಗ್ತಾ. ಭಿಸ್ಪಾಚೆಂ, ಕಾರ್ಮೆಲಿತಾಂಚೆಂ, ಕಾಪುಚಿನ್ ಫ್ರಾದಿಚೆಂ ಆನಿ ಸಬಾರ್ ಸಂಸ್ಥ್ಯಾಂ ಥಾವ್ನ್ ಮೀಸ್, ಖುರ್ಸಾವಾಟೊ, ಮಾಗ್ಣಿಂ ಅಶೆಂ ಯೂಟ್ಯೂಬಾರ್ ಯಾ ವಾಟ್ಸಪ್ ಗ್ರೂಪಾನಿಂ ಆಮಿಂ ಕ್ರೀಸ್ತಾಂವ್ ಭಾವ್‍ಭಯ್ಣಿ ಆಯ್ಕೊನ್ ಆಸಾಂವ್, ಮೀಸಾಂ ಭೆಟವ್ನ್ ಆಸಾಂವ್. ಎದೊಳ್ ಸದಾಂ ಮೀಸಾಕ್ ವೊಚೊಂಕ್ ಪಾವ್ಟ್ ಜಾಯ್ನಾತ್ಲ್ಯಾ ಆಮ್ಕಾಂ (ಯಾ ಥೊಡೆ ಪಾವ್ಟಿಂ ಆಳ್ಸಾಯೆನ್ ವಚಾನಾಸ್ತಾಂ ಆಸ್ಚಿಂ) ಆಮಿಂ ಆತಾಂ ಸದಾೈಂ ಮೀಸ್ ಆಯ್ಕೊಂಚಿ ಸವಯ್ ಜಾಲ್ಯಾ ಮ್ಹಳ್ಯಾರ್ ದುಬಾವ್‍ನಾಂ. ಆನಿ ಥೊಡ್ಯಾಂಚಿ ಅಭಿಪ್ರಾಯ್ ಅಶಿ ಆಸಾ “ಘರಾ ಥಾವ್ನ್ ಮೀಸ್ ಆಯ್ಕೊಂಚೆಂ (ಭೆಟಂವ್ಚೆಂ ನೈಂ!!) ಭೋವ್ ಸಲೀಸ್. ಲಾಕ್‍ಡೌನ್ ಕಾಡ್ಲ್ಯಾ ಉಪ್ರಾಂತ್, ಕೊರೊನಾ ವೈರಸ್ ಧಾಂವ್ಲ್ಯಾ ಉಪ್ರಾಂತೀ, ಹೆಂಚ್ ಲಾಗು ಜಲ್ಯಾರ್, ಕಿತ್ಲೆಂ ಬರೆಂ ಆಸ್ತೆಂ” [ಆತಾಂ ಹೆಂ ವಾಚ್ತಾನಾ ತುಜಾ ಮತಿಕೀ ಅಸಲಿ ಐಡಿಯಾ ಯೇನಾ ಜಾಲ್ಯಾರ್ ಪುರೊ]
ಆಮಿಂ ಲ್ಹಾನ್ ಥಾವ್ನ್ ವಡ್ ಜಾತಾ ಮ್ಹುಣಾಸರ್, ‘ಸೋಶಲ್ ಮೀಡಿಯಾ’ ಇತ್ಲಿ ಮುಂದರುಂಕ್ ನಾತ್‍ಲ್ಲ್ಯಾ ವೆಳಾರೀ ಝುಜಾಂ, ವೈರಸಾಂ, ಪಿಡಾ ಖಂಡಿತ್ ಆಸ್‍ಲ್ಲ್ಯೊ. ಪೂನ್ ಆಜ್‍ಕಾಲ್ ಹ್ಯಾ ಮೀಡಿಯಾಚಾ ಪ್ರಭಾವಾನ್, ‘ಆಪುನ್ ಸಕ್ಟಾಂ ವರ್ನಿ ಮುಕಾರ್ ಆಸಾಂ’ ಮ್ಹುಣ್ ದಾಕಂವ್ಚ್ಯಾ ಉರ್ಬೆನ್ ಸಬಾರ್ ಪಾವ್ಟಿಂ ಬರ್ಯಾ ಖಬ್ರಾಂ ಪ್ರಾಸ್ ಚಡ್ತಿಕ್ ‘ಫೇಕ್’ ಖಬ್ರೊ ಯೆಂವ್ಚ್ಯೆ ಆಮ್ಕಾಂ ದಿಸೊನ್ ಯೆತಾ. ಥೊಡ್ಯಾಂಕ್ ಇತ್ಲಿ ಖೊರೊಜ್‍ಗೀ, ಆಪ್ಣೆಂ ತೆಂ ಪಯಿಲ್ಲೆಂ ‘ಫಾರ್ವರ್ಡ್’ ಕರಿಜಯ್ ಮ್ಹುಳ್ಯಾ ದರ್ವಡಾನ್, ತೆಂ ಧಾಡ್ನ್‍ಯಿ ಸೊಡ್ತಾತ್. ಆನಿ ಥೊಡೆ ಆನಿಕೀ ಚಡ್ ಬುದ್ವಂತ್, ‘ಹ್ಯೊ ಪೂರಾ ವಾಚುನ್ ತ್ಯೊ ಖಂಚಾ ರಿತಿರ್ ‘ಫೇಕ್’ ಆಸಾತ್ ತೆಂ ಬರಯ್ತಾತ್. ಒಟ್ಟಾರೆ, ಹ್ಯಾ ಕರೆಜ್ಮಾಚಾ ದೀಸಾನಿಂ ಖಂಚೆಂ ಸತ್, ಖಂಚೆಂ ಫಟ್ ಮ್ಹುಣ್ ಸಮ್ಜಾನಾತ್ಲೆ ತಿತ್ಲೆ ವಿಷಯ್ ಆಮ್ಚೆ ಮುಖಾರ್ ಆಸಾತ್.
ಹೆಂ ಬರೆಯ್ತಾನಾ, ಆಮಿ ಭಾಗೆವಂತ್ ಹಫ್ತ್ಯಾಂತ್ ಪಾಂಯ್ ದವರ್ಲಾ. ಆಯ್ತಾರಾಚೆಂ ಮೀಸ್ ಕಶೆಂಯೀ ಮೊಬೈಲಾರ್ ಭೆಟಯ್ಲೆಂ, ತರೀ ಭಾಗೆವಂತ್ ಹಫ್ತ್ಯಾಂತ್ ‘ತ್ರಿದುಮ್’ ಏಕ್ ವರ್ತ್ಯ ಸೊಭಾಯೆಚೆ ದೀಸ್ ಜಾಲ್ಲ್ಯಾನ್ ಮನ್ ಆಯ್ಕಾನಾ. ತರೀ ದುಸ್ರೊ ಉಪಾಯ್ ಆಸಾ?
ನಿಮಾಣ್ಯಾ ಬ್ರೆಸ್ತಾರಾ ಆಮಿ ಮೊಬೈಲಾರ್‍ಚ್ ಮೀಸ್ ಭೆಟೆಯ್ತೆಲ್ಯಾಂವ್. ಪೂಣ್ ‘ಆಪೊಸ್ತಲಾಂಚೆ ಪಾಂಯ್ ಧುಂವ್ಚಿ’ ಸೆರೆಮನಿ ಆಸ್ಚಿನಾ. ಲ್ಹಾನ್ ಬುರ್ಗ್ಯಾಂನಿ, ತೀಳ್ನ್ ಪಳೆಂವ್ಚಿ, ಉಂಡೊ ದಿತಾನಾ ತ್ಯಾ ವಿಶ್ಯಾಂತ್ ಸವಲಾಂ ವಿಚಾರ್ಚಿಂ, ಹೆಂ ಹ್ಯಾ ವರ್ಸಾ ನಾಂ. ವಿಶೆವಾಚಾ ಆಲ್ತಾರಾರ್ ಆಸ್ಚ್ಯಾ ಜೆಜುಕ್ ಭೆಟೊಂಕ್ ಆವ್ಕಾಸ್ ನಾಂ. ತೀನೀ ದೀಸಾನಿಂ ವಿವಿಧ್ ಪಂಗ್ಡಾಂ ಥಾವ್ನ್ ‘ಕೊಯೆರ್’ ನಾಂ, ಯುವಜಣಾಂನಿಂ ಹ್ಯಾ ದೀಸಾನಿಂ ಇಗರ್ಜೆ ವಠಾರಾರ್ ಚಡ್ ಆಸೊನ್ ಕುಮ್ಕೆಚೊ ಹಾತ್ ದಿಂವ್ಚೆ ದಿಸೊನ್ ಯೆಂವ್ಚೊನಾ.
ನಿಮಾಣ್ಯಾ ಸುಕ್ರಾರಾ ದನ್ಪಾರಾಂ ವೆಳಾರ್ ಜಾಂವ್ಚಿ, ಬೋವ್ ಅರ್ಥಾಭರಿತ್ ಖುರ್ಸಾಚಿ ವಾಟ್ ಹೆ ಪಾವ್ಟಿಂನಾಂ. ಸಾಂಜೆಚಿ ಸೆರೆಮನಿ ಹಾಜರ್ ಜಾಂವ್ಕ್ ಯೆಂವ್ಚೊ ಹಜಾರೊಂ ಲೋಕ್ ಹ್ಯೆ ಪಾವ್ಟಿಂ ಪಳೆಂವ್ಕ್ ಮೆಳ್ಚೊನಾಂ. ಸನ್ವಾರಾ ಸಾಕಾಳಿಂ ‘ಮರ್ಯೆ ಮಾಯೆ ಸಾಂಗಾತಾ’ ಥೊಡೊ ವೇಳ್ ಖರ್ಚುನ್, ತಿಕಾ ಭುಜಂವ್ಕ್ ಹೆ ಪಾವ್ಟಿಂ ಸಾಧ್ಯನಾಂ.
ಆನಿ ‘ಪಾಸ್ಕಾಂಚಿ ಪರಬ್’ ಆಮ್ಚ್ಯಾ ಕ್ರಿಸ್ತಾಂವಾಂಚಾ ಭಾವಾರ್ಥಾಚಿ ಬುನ್ಯಾದ್ ಜಾವ್ನಾಸ್ಚೊ ತೊ ವರ್ತೊ ದೀಸ್, ರಾತಿಂ ಉಜ್ವಾಡ್ ಬೆಂಜಾರಾವ್ನ್, ಹಾತಿಂ ವಾತಿ ಘೆವುನ್ ಭಿತರ್ ಸರ್ನ್ ದಬಾಜಿಕ್ ಮೀಸಾಂತ್ ವಾಂಟೊ ಘೆಂವ್ಕ್ ಹೆ ಪಾವ್ಟಿಂ ಸಾಧ್ಯನಾಂ.
ಪೂಣ್, ಆಮಿ ದೆವಾಚಿಂ ಭುರ್ಗಿಂ, ‘ಆಮ್ಚೊ ಸೊಮಿ ಜೀವಂತ್ ಜಾಲಾ’ ತೊ ಆಮ್ಚಿ ಸೊದ್ವಣ್ ಖಂಡಿತ್ ಕರ್ತಾ, ಹ್ಯಾ ಕೊರೊನಾ ಖರ್ಗಾತ್ಲೆಂ ಆಮ್ಕಾಂ ಆನಿ ಸಗ್ಳ್ಯಾ ಸಂಸಾರಾಕ್ ನಿವಾರ್ತಾ ಮ್ಹುಳ್ಳೊ ವರ್ತೊ ಭಾವಾರ್ಥ್ ಆನಿ ಭರ್ವಸೊ ‘ಪಾಸ್ಖಾಂ ಫಸ್ತ್ತ್’ 2020, ಜಿವೊ ದವರ್ತಲೊ.
